個個都又靚又叻 最新星二代潛力股

加入娛樂圈做得藝人,樣貌多數都出眾。佢哋嘅仔女當然遺傳佢哋優良基因,所以呢班星二代嘅顏值一定有番咁上下。除咗顏值高之外,佢哋嘅氣質同埋學歷都非常出眾,萬千寵愛在一身。唔少星二代已經成為傳媒追訪嘅目標,今日就同大家睇下有邊啲最新星二代潛力股啦!

邱淑貞女兒 - 沈月

image

邱淑貞和沈嘉偉嘅大女沈月已經17歲,完全遺傳晒媽咪嘅美人基因,擁有精緻五官,兼有衣著品味,被稱為「最美星二代」。自從樣貌曝光後,沈月一直成為傳媒追訪嘅目標。一早已經表示對娛樂圈不感興趣,最近佢破例參加爸爸旗下品牌喺倫敦時裝周做模特兒行天橋,沈月表現淡定,加上一身仙氣時尚打扮,真係一啲都唔輸蝕比媽咪。

任達華與琦琦女兒 - 任晴佳

image

任達華與琦琦嘅女兒任晴佳(Ella)只得14歲,佢除咗擁有爸爸媽媽嘅高顏值樣貌之外,更加遺傳咗媽媽fit爆嘅Model身型。擁有170cm身高加上一雙逆天長腿,連琦琦都忍唔住話囡囡嘅身材比自己好,Ella絕對有條件同媽媽一樣做模連兒。

上山詩鈉女兒 - Hilary

image

上山詩鈉的女兒Hilary有「最索星二代」之稱,21歲嘅佢遺傳晒媽咪混血兒嘅美貌,仲越大越靚女,充滿仙氣。喺去年12月美國波士頓大學畢業嘅佢,被傳與富三代施仲樂秘撻後,上個月已經融入男友家中,陪男友三代同堂喺跑馬地馬場拉頭馬。

龔慈恩女兒 - 林愷鈴

image

昔日無線花旦龔慈恩嘅18歲林愷鈴(Ashley),佢遺傳咗媽咪嘅靚女基因,擁有標致美貌和星味,加上身高173cm,更被稱為「港版允兒」。Ashley除咗擁有外在美之外,佢仲品學兼優、琴棋書畫樣樣掂,Ashley考國際預科文憑考獲41分,成功入讀第一志願港大建築系。Ashley自細已經好鍾意音樂,佢8歲嘅時候已經考獲6級鋼琴資格、8級聲樂資格,之後仲學埋小提琴、吹長笛、劍術及騎術。早前仲簽約杜琪峯旗下,成為藝人及模特兒,佢成個package行出嚟真係無得輸呀!

湯鎮業孖仔 - 湯君慈及湯君耀

image

「 無綫五虎將」之一湯鎮業嘅一對23歲相差兩分鐘出世孖仔,大孖湯君慈(Bruce)同細孖湯君耀(Chris)外表俊朗又有型。就讀於美國加州大學洛杉磯分校(UCLA)修讀社會學及電影,2017年畢業後已經簽約成為「宇宙最強」甄子丹公司旗下,處男作就係伙拍甄子丹拍攝電影《大師兄》。

馬德鐘兒子 — 馬在驤

image

今年20歲嘅馬在驤,除咗同老竇馬德鐘一樣生得高大威猛之外,佢仲係運動健將,6歲開始習泳,仲參加過學界及唔少游泳比賽均屢獲獎項。佢現時喺澳洲修讀機械工程,目前以學業為先,不過佢就話對工程同埋娛樂圈幕前工作都有興趣。

關禮傑大女 - 關楓馨

image

今年24歲嘅關禮傑大女關楓馨(Fabienne),遺傳父母嘅優良基因,樣貌甜美,顏值超班。2016年畢業於英國大學University of Southampton,之後去咗澳洲工作假期一年,Fabienne啱啱仲喺英國讀完碩士學位,主修兒童權益。有樣有學歷嘅Fabienne,有傳無綫喺2016年已經睇中咗佢,曾被力邀參選港姐,不過當時仲讀緊書,所以不為所動。有傳無綫未有放棄,早前仲出動重金利誘,力邀Fabienne加盟無綫旗下,希望關禮傑同囡囡可以父女檔上陣拍劇。

【唔係淨係靠樣】娛樂圈邊位藝人成功轉型從商

近年,創業成為潮流所趨,唔少人都選擇創業,實行自己做老闆。其實唔少明星都轉型從商,以下呢班明星仲證明畀大家,佢哋唔係淨係靠個樣搵食,而係靠頭腦同努力去建立自己嘅事業王國。

黎姿

image

黎姿 (Gigi,現已改名為黎珈而)拍過唔少經典電影及劇集,當中最令人留下深刻印象嘅一定係《古惑仔》系列飾演細細粒同埋《金枝慾孽》 嘅玉瑩小主。當年黎姿將讀書嘅機會俾咗細佬黎嬰,而自己就入娛樂圈賺錢養家,後來成為當家花旦,但07年細佬遇上嚴重車禍,黎姿即刻放低手頭上所有工作,日日去醫院照顧細佬。2008年以照顧細佬為由宣布引退,棄影從商,接手細佬黎嬰創立嘅醫學美容公司。近年忙於管理美容事業,喺2017年佢公司喺港交所創業板上市,喺早前,佢成功將公司從創業板升至主板上市。

張玉珊

image

15歲被星探發掘拍廣告,18歲正式入行做明星,雖然張玉珊星運平平,但係佢自己知道自己唔係食娛樂圈呢行飯。佢喺25歲嘅時候,有朋友介紹一啲中藥配方嘅修身食品,於是佢就抱住試下嘅心態,買咗產品嘅代理權同埋用咗幾千元註冊咗間公司。喺短短10日,佢就已經做到6位數字嘅營業額。張玉珊其後全身投入做生意,正式告別娛樂圈。2000年創立纖體美容公司,2003年成功將公司上市。當年只有28歲嘅佢,曾經係香港最年輕的上市公司CEO。不過佢16年已經辭任行政總裁,決定放慢工作步伐,而家主力做慈善工作。

袁彌明

image

喺2005年,袁彌明憑參選香港小姐入行,可惜發展平平。2007年離開無綫並開始拍片放上網分享化妝美容心得,事隔兩年更創立護膚品和健康食品專門店,喺開頭佢由網上收單,去到交收都係一腳踢。後來,公司業績一直不斷增長,員工亦越來越多,唔少品牌仲主動聯絡佢傾合作,到而家每年經營逾1億元嘅生意。喺上年,主席兼行政總裁袁彌明成功將公司喺港交所創業板上市,至今有9間分店,公司仲計劃喺下年首季前,增至14間分店。

謝霆鋒

image

謝霆鋒喺16歲嘅時候,以星二代身份殺入娛樂圈,主力唱歌及拍戲,成為當時紅極一時嘅藝人。2001年,歌曲《玉蝴蝶》嘅後製達唔到佢想要嘅效果,後製團隊仲話要外國公司先可以做到。謝霆鋒唔信香港做唔到,所以佢喺2003年創辦後製公司,公司開頭唔係好順利,不過經過一番堅持之後,公司越做越順,2015年喺香港上市。近年佢開始涉足飲食界,除咗以廚師形象拍攝美食真人騷《鋒味》系列之外,佢仲推出自家製曲奇、月餅及撈麵等等,吸引唔少人排隊搶購,成功殺出一條血路。

趙薇

image

憑內地劇集《還珠格格》飾演小燕子一角彈出嘅趙薇,有樣有演技嘅佢,當年更係內地四大花旦之一,紅透半邊天。趙薇除咗演而優則導,喺12年執導電影《致我們終將逝去的青春》,佢仲成立自己嘅影視公司。除咗演藝事業亮眼,佢同時積極從商,好似經營葡萄酒貿易事業、斥資31億港元買入阿里巴巴影業及以30.6億人民幣收購内地上市公司萬家文化29%嘅股權等等。不過早前趙薇涉及「空殼交易」,所以上海證券交易對趙薇夫婦紀律處分決定,就係五年內禁任內地上市公司董事,不過趙薇於上周五已提出上訴。

【鑽石筍盤】家底豐厚有車又有樓 御用有錢人黃子雄鍾情搭巴士

image

無綫劇集經常出現御用角色,好似擁有8分1挪威及8分1蘇格蘭血統嘅黃子雄(Geoff)咁,佢大部份嘅角色都係飾演有錢人或者係企業高層,例如《同事三分親》嘅Vincent、《愛‧回家》嘅Damon及《再創世紀》嘅Paul少等等,所以被封為「御用有錢人」。其實黃子雄唔止係劇中嘅筍盤,現實生活中佢都係一個「鑽石筍盤」。

image

現年50歲嘅黃子雄,媽媽開辦出版社,仲曾於英國留學,畢業於倫敦國王學院(King’s College London)。1991年返香港之後,講得一口流利英語嘅佢曾經做過市場推廣嘅工作。1995年經親戚介紹佢去明珠台做主持。之後,黃子雄仲得到戲劇總監曾勵珍嘅賞識,搵佢出演《真情》飾演建築師會主席徐應變一角,正式開始佢嘅演藝生涯。

喺唔少劇集中,Geoff都係飾演一個愛溝女嘅有錢人,經常有唔少女伴喺身邊,但現實中嘅佢其實好專一,同前無綫藝員夏竹欣拍拖8年,直至上年因了解而分手,做返鑽石王老五。

image

回復單身嘅Geoff,享受自己行超級市場同行街買衫。雖然有車有樓,但係佢平時鍾意搭公共交通工具,早前曾被傳媒影到佢行完街搭巴士返屋企。佢仲話自己最喜愛嘅交通工具係渡海小輪,而巴士、地鐵、小巴佢都會坐。佢會視乎方便而選擇乘搭邊種交通工具,不過如果要過海買嘢,佢就唔會揸車,因為搵位泊車佢覺得仲麻煩。其實連之前同夏竹欣拍拖,佢哋都會成日一齊坐巴士。

喺報道中,傳媒仲問佢係唔係唔欣賞比較現實嘅港女,佢就話一般香港女仔好期待搵金龜婿,佢唔係嗰種人。不過佢就話港女絕對唔會欣賞佢,唔會揀佢。至於擇偶條件,佢就覺得同外國人發展嘅機會大啲,因為外國人比較唔太在乎物質上或者錢銀嘅問題,只要大家互相鍾意就可以喺埋一齊。

【做壞規矩?】歐鎧淳為同男友一齊跑渣馬 唔跟所屬組別開跑?

image

一年一度嘅渣打馬拉松喺星期日已經圓滿舉行,除咗吸引大量市民參加之外,娛樂圈亦有唔少藝人報名參加。香港泳隊「美人魚」歐鎧淳與男友胡子彤都有去跑,不過就被網民發現歐鎧淳冇喺自己所屬嘅G組6時15分比賽時間開始,反而去咗男友胡子彤所屬嘅K組7時45分嗰度跑。

相信唔少人都想同另自己另一半、朋友或家人一齊跑,但係根據渣馬官方網頁,入面清楚寫明如果參賽者冇按照指定參加組別嘅時間起跑或自行轉換項目,佢嘅成績同埋參賽資格都會被取消,同時係唔會獲發成績證書或完成獎牌。

網民即刻翻查佢哋嘅成績,歐鎧淳及胡子彤分別用咗57分11秒及57分12秒,喺8時56分去完成賽事。唔少網民紛紛質疑大會,因為歐鎧淳係運動員嘅關係而給予特權,俾佢延遲開跑,可以同男友溫馨一齊跑。

image

事件曝光後,唔少網民指責身為運動員嘅歐鎧淳帶頭做壞規矩,及批評大會雙重標準同埋冇好好把關,點解歐鎧淳可以入check point,而其他人就唔可以。

渣馬代言人事後就事件回應,聲稱歐鎧淳已經被取消參賽資格,喺大會嘅成績查閱系統唔會有佢嘅紀錄,同時亦唔會獲發完賽證書。

其實身為香港運動員,歐鎧淳係唔係應該要做好榜樣俾其他人睇,而唔係帶頭做壞規矩呢?!

雙眼皮唔再係大勢 細數娛樂圈魅力單眼皮男星

成龍大哥一向都係網民嘅熱門討論人物,近日佢又登上微博熱搜榜,今次唔關工作、言論或者家人事,而係成龍大哥嘅雙眼皮。有網民爆出大哥本來想演一個角色,不過被武俠小說家古龍嫌棄,之後大哥喺1979拍攝《醉拳》嘅時候,眼角被踢到爆缸,所以就順便做埋割雙眼皮手術。不過近年隨著韓流席捲全球,濃眉大眼已經唔再係大勢所向,反而大家開始鍾情單眼皮男星,認為佢哋仲charm。今日就同大家數下娛樂圈有邊啲單眼皮男神啦~

image

【減咗95%人工】資深綠葉演員劉桂芳轉做part time

image

喺無綫工作超過23年嘅蓋世寶(LuLu),曾經主持兒童節目18年,係唔少80、90後嘅童年回憶,不過將於2月約滿嘅佢,被公司要求人工減三分一至7千蚊,所以日前佢宣布離開決心離巢。消息傳出後,唔少網民都支持佢呢個決定。

不過被減人工嘅藝人,唔止蓋世寶一個,原來仲有大把,有啲仲慘過Lulu,好似61歲嘅資深綠葉演員劉桂芳,佢睇完Lulu嘅報導後,忍唔住喺Lulu嘅社交網站上留言話自己嘅人工被減咗百分之95。

之後,劉桂芳接受傳媒訪問嘅時候就話公司好多員工都係咁,不過佢話無綫話呢啲唔係叫減薪,係改佢哋嘅合約,改晒做兼職。劉桂芳仲話呢啲嘢冇得講,因為係你情我願,無綫可以叫佢唔簽,但係佢又唔想周圍走,所以就俾佢減人工。

唔知仲有邊位藝人同佢一樣情況呢?

image
image
image

湯怡跑全馬破肯雅徐記錄 藝人渣打馬拉松成績逐個睇

image

噚日就係一年一度嘅渣打馬拉松,今屆參加嘅人數再創新高,吸引咗多達7萬多人報名參加。娛樂圈亦有唔少藝人分別參加10公里、半馬及全馬組別賽事。今年最犀利嘅應該係首次挑戰全馬賽事嘅湯怡,佢以4小時15分完成,比起「肯雅徐」徐濠縈過往嘅4小時16分紀錄仲要快,不如我哋一齊睇下佢哋嘅成績啦!

10K
歐鎧淳(57分11秒)
胡子彤(57分12秒)
董嘉儀(59分44秒)
葉晴晴Robynn(1小時01分29秒)
蘇麗珊(1小時02分鐘11秒)
曾淑雅Jumbo(1小時02分21秒)
楊柳青(1小時02分52秒)
林奕匡(1小時04分14秒)
連詩雅(1小時06分37秒)
張紋嘉(1小時08分10秒)
[email protected] Jane(1小時13分鐘26秒)
林穎彤(1小時14分鐘26秒)

image
image
image

半馬
馮允謙(1小時37分40秒)
湯君慈(1小時45分09秒)
梁諾妍(1小時47分37秒)
On仔(1小時57分03秒)
釗峰(2小時00分42秒)
袁偉豪(2小時04分20秒)
李靖筠(2小時07分41秒)
鄭融(2小時17分31秒)
洪嘉豪(2小時19分41秒)
[email protected] Jane(2小時19分46秒)

image
image

全馬
胡諾言(3小時45分鐘04秒)
周子駒(3小時58分40秒)
湯怡(4小時15分10秒)
DJ當奴(4小時20分22秒)

image
image

【好期待呀!】《褔爾摩師奶》下週一首播 傳《鐵探》將接棒4月出街

image

由陳松伶、黃智賢、徐榮、 陳煒、陳瀅、余德丞及江嘉敏等主演嘅無綫劇集《褔爾摩師奶》喺上年年中已完成拍攝,去到近日終於有宣傳片出街。劇集將會緊接《荷里活有個大老千》檔期喺下星期一首播。新劇以20至30年代做背景,集奇情懸疑於一身,一邊講述上流社會而另一邊就講述低下階層嘅生活。松松姐姐將會飾演華人爵士夫人First Lady,講述佢原本喺居住於半山大宅,不過老公失勢兼失蹤,而被迫經歷風雨。之後佢仲做埋女版福爾摩斯查案,調查多宗案件。

image

雖然《褔爾摩師奶》仲未出街,不過已經傳緊邊一套劇集接棒。早前傳過由譚俊彥、胡定欣、張振朗、曹永廉及姚子羚主演劇《包青天再起風雲》將會接《褔爾摩師奶》棒於4月1日出街,不過近日再傳出係播由袁偉豪、惠英紅、黃智賢、姜皓文、許紹雄等實力派演員主演嘅警匪劇集《鐵探》先啱。

image

《鐵探》除咗卡士強勁,劇集仲充滿劇味。劇情主要講述督察尚垶(袁偉豪飾)原本係警隊嘅明日之星,點知喺一次行動中為咗救戰友,俾匪徒一槍穿腦,雖然奇蹟生還,不過飽受槍傷後遺症折磨,令到個人暴躁、甚至失禁!不過同時亦令佢頑強熱血咁查案,所以得到「鐵探」呢個稱號。

image

唔少網民知道消息都話好期待,好想睇三屆金像影后惠英紅同啱啱獲提名金像獎影帝嘅黑仔姜皓文喺劇中大鬥演技。同時,亦有網民表示淨係唔想喺黃金時間睇內地劇集。

【輸人不輸陣?】傳破產期被延長 吳剛師傅與屋企人照光鮮打扮行街街

image

只要一提起吳剛師傅,大家好自然就會諗起佢喺《歡樂滿東華》心口碎大石、食炭及飲滾油等經典亡命表演。不過佢已淡出娛樂圈多年,仲曾經投身飲食界,而家就主要喺內地工作。吳師傅始終都曾經係圈中人,唔好以為淡出咗娛樂圈就唔打扮,有報道指佢同屋企就算落屋企樓下嘅商場行街街都執得好行,浮誇到好似巨星家族咁,更吸引到唔少人對佢哋一家行注目禮。

報道仲話原名吳信義嘅佢,喺11年嘅時候被金融公司入稟申請破產,之前佢就話交俾律師搞,但原來仲未處理好,破產期仲被延長去到今年7月。之前佢曾經講過因為合約嘅糾紛,所以先捲入破產風波,佢仲話之後同人簽合約會一千個小心,同埋一定會請律師跟進。

吳師傅一家現時仲住喺尖沙咀豪宅,而一對仔女已經喺英國大學畢業。睇佢同屋企人嘅一身光鮮衣著,霸氣十足,一啲都睇唔出佢嘅經濟出現問題囉!

【情人節快樂】日久生情! 細數無綫拍劇撻著夫婦

今日係情人節,唔少藝人都喺社交網站放閃,其實咁多年嚟唔少男女藝人,都因為喺拍劇或者主持節目拍出真感情而搵到真愛,最後更有情人終成眷熟成為夫妻。趁住呢個咁sweet嘅日子,等我哋同大家數下有邊對夫妻因拍劇/節目而撻著啦!

鄭嘉穎 & 陳凱琳

image

佢哋因拍攝劇集《殭》認識而撻着,雖然年齡相差22歲,由戀情開始不被看好,甚至有指遭到女方屋企人嘅反對,經過努力後終於修成正果。上年8月喺印尼峇里舉行婚禮,婚後十分幸福,好快就升呢準爸爸準媽媽,有傳BB嘅預產期係今年3月。

蕭正楠 & 黃翠如

image

黃翠如同蕭正楠因拍攝劇集《師奶MADAM》戲假情真,直至14年5月將戀情公開。關係公開後,佢哋越愛越高調,不時喺社交網站甜蜜晒恩愛及以情侶檔身份出席活動。佢哋一直被外界睇好,更多次傳出婚訊。喺上年年尾嘅《萬千星輝頒獎典禮》入面,蕭正楠講得獎感受嘅時候突然宣布佢哋已婚嘅消息,真係恭喜晒。

羅仲謙 & 楊怡

image

楊怡雖然比羅仲謙年長5年,但呢對姐弟戀最終開花結果,有情人終成眷屬!兩人於2012年拍攝劇集《On Call 36小時》而撻着。兩人於2016年結婚,不時喺網上放閃,仲經常周遊列國。

陳智燊 & 宋熙年

image

陳智燊(Jason)同宋熙年(Sarah)分別於英國同澳洲讀書長大,大家一齊接受外國教育。佢哋喺無綫主持節目《港生活.港享受》認識而相戀。佢哋喺16年拉埋天窗,上年9月更誕下囝囝Damon。

陳豪 & 陳茵媺

image

陳豪同陳茵媺喺2010年拍攝劇集《心戰》而撻着。拍拖兩年後於巴黎結婚。婚後陳豪繼努力拍劇及打理自家品牌咖啡生意,陳茵媺就努力照顧家庭。二人婚後三年抱三,育有2子1女,一家五口幸福美滿。

郭晉安 & 歐倩怡

image

郭晉安同歐倩怡因拍攝旅遊節目而相識。當時二人事業上仍然未上高峰,大家互相鼓勵及攜手共渡難關。拍拖7年後,2006年修成正果,正式註冊結婚。郭晉安後期事業十分出色,多次為無綫劇集擔任男主角,而歐倩怡就淡出娛樂圈。佢哋結婚超過10年,育有一子一女,好幸福呀!

王浩信 & 陳自瑤

image

王浩信及陳自瑤喺08年因劇集《野蠻奶奶大戰戈師奶》邂逅,雖然二人劇裡冇對手戲,但因為出席唔同聚會而熟落。當時女方同前度蔡淇俊已分手,有傳浩信當時一直展開追求。拍拖3年後更於2011年11月11日上午11時結婚,二人結婚七年,更育有一囡。

錢嘉樂 & 湯盈盈

image

佢哋係喺2007年到台灣拍攝節目而熟絡,更係盈盈親自追求家樂。12年開花結果,婚後育有兩囡。婚後盈盈繼續參與拍劇工作,好似《愛·回家之開心速遞》都有佢嘅演出,而老公錢嘉樂繼續拍戲同擔任武術指導。

陳榮峻 & 吳香倫

image

黃昏戀修成正果,陳榮峻與吳香倫同為無綫甘草演員,陳榮峻前妻因病離開。佢哋2010年因拍攝拍劇《怒火街頭》而認識,直至14年陳榮峻走出喪妻傷痛,與吳香倫相戀。拍拖三年幾,在仔女及朋友支持下,陳榮峻向吳香倫求婚,更於上年拉埋天窗。

楊證樺 & 沈可欣

image

佢哋同樣都係無綫嘅綠葉演員,雙方已經認識十幾年,仲經常喺劇集飾演夫妻。2015年結婚,至今育有2子。

驚大家嫌我哋長氣,其實仲有張家輝與關詠荷、劉青雲與郭藹明及梁朝偉與劉嘉玲等恩愛couples 架!