日本男人推介 4款外套就可以著夠一年

正所謂「Fashion嘅嘢你識條鐵咩」,今時今日fashion界經常令人無法理解,創意度滿分,可惜唔係人人敢著。估唔到向來sell實用易著嘅UNIQLO都出事,一件新出嘅外套狂被網民恥笑!

最近UNIQLO陸續推出春夏新裝,其中一件男裝外套款特別受到關注,因為呢件軍事外套(ミリタリージャケッ)正面設計有4個大袋,被日本網友取笑激似中山裝…「根本係毛澤東」、「比較似金正日吧」,亦有人話似「囚犯」、「人民公社」、「北越士兵」、「啱啱戰敗嘅日本兵」等等,仲有人搞笑上載埋幾頂士兵帽,話唔知應該襯邊頂好!

其實呢件衫畀鬼佬model著嚟影相,個人認為尚算OK,但亞洲人就真係比較難carry…近日天氣早晚溫差都大,想帶外套,建議以下呢幾款比較穩陣!

1.牛仔外套

牛仔係一年四季都興嘅元素,牛仔外套亦係男生最愛著嘅外套款式之一,簡單內搭恤衫下身襯返牛仔褲denim on denim1又得,或者襯上杏色chino pants,打造休閒文青感。

2.恤衫外套

薄身嘅恤衫既可以單著,又可以當外套增加層次感,春夏天點都要有件旁身。

3.軍事外套

充滿男人味嘅軍裝元素外套,向來深受男士喜愛,迷彩、軍綠、啡色都係大路顏色。

4.飛行外套

源自MA-1嘅Bomber Jacket飛行員外套,近幾季幾乎男男女女都總有一件在手,著上就係型。

圖片來源:UNIQLO,2CH

家有一老 阿嫲太好心幫手縫埋爛牛仔褲啲窿!

自認走在潮流尖端,衣櫃入面點會冇條爛牛坐陣?但老一輩似乎唔多識欣賞,最近就有位日本網民大呻自己條爛牛畀阿嫲縫埋啲窿,都唔知好嬲定好笑喇。

早前有位男網友po咗張牛仔褲相上討論區2ch,原本佢條牛仔褲有好多「刷爛」嘅裝飾,但阿嫲以為乖孫條褲著爛咗,趁佢唔喺度嗰陣幫佢縫起哂爛牛上面啲窿,日男發帖文表示失落,不過其他網友一面倒大讚嫲嫲手勢好,「嫲嫲真體貼,縫得超靚」、「咁樣反而仲好睇,遲啲可能會興呀」,勸日男要好好珍惜呢條褲,「多啲著條褲多謝嫲嫲啦」,日男見大家反應唔錯,心情變好,仲話「搵日真係著出街睇睇先」。

話時話,爛牛係潮,不過當牛仔褲嘅破洞越來越大,好影響觀感,著亦麻煩,不如利用以下幾個創意物料修補,令爛牛起死回生!

1.牛仔布

DIY用剩嘅牛仔布碎,或者從舊牛仔褲剪布出嚟用,覆蓋喺破洞上,縫好後變成流行嘅deconstructed jeans。

2.魚網

魚網絲襪襯爛牛係日本妹慣常著法,如果將「魚網」直接縫上爛牛,既可以防止破洞變大,又可以DIY一件潮物出來,一舉兩得。

3.繡章

繡章牛仔褲係街頭常見大熱item,不妨試下於破洞位置燙上幾個心水燙章,又潮又有玩味。

圖片來源:2ch

港女講日:日本女人公認的「靚仔5大特點」

每個女人心中都會有一個對於「帥哥」嘅定義,未必一定係好靚仔或者好有錢,咁喺日本女大學生眼中,咩男生先叫做「帥」呢?

日本網站《gakumado》最近以「成為帥哥的條件」做調查,以下係Top 5,同你哋心目中又同唔同呢?

第5位 髮型要好睇

對日本年輕女性嚟講,髮型好壞係決定佢係唔係靚仔嘅重要因素,髮型可以改變一個人嘅外表,唔想女生覺得你又薯又老土,快啲搵個好嘅髮型師轉轉look!

第4位 眼睛要有神

女生特別注意男仔嘅眼神,眼仔碌碌、炯炯有神咁望住女仔,對方一定畀你電暈!相反,眼神空洞、呆滯絕對係大忌,就算你五官標緻,對眼冇神一樣唔會得到女生歡心。

第3位 鼻樑要夠高

鼻高唔一定係靚仔靚女,但一個大鼻、扁鼻嘅人,都常都與「靚」未無緣,so sad…

第2位 著衫要時尚

鼻扁冇得救,不過穿搭可以!日本妹向來重視個人style,如果你能夠畀到佢哋有「你識著衫」、「有品味」嘅印象,同樣係一大加分位。

第1位 身高要夠高

現實係殘酷,以上幾點都可以靠後天調整惡補,身高就真係幫你唔到。高大嘅男生可以更易令女生產生想依靠嘅感覺,著咩衫整咩造型都會比較好睇。

圖片來源: 日網joseishi、besttimes

外國人投訴日本旅行5大缺點?

日本係唔少人出國旅遊嘅第一選擇,頻密程度多過返鄉下,就知日本有幾咁吸引啦!

唔只香港人鍾意「返鄉下」,美國人亦一樣,美國Reddit討論區有一個日本旅遊板(JapanTravel),經常講起日本有邊度好玩嘅話題。不過所有嘢都有優點同埋缺點嘅,日本都唔例外,最近就有個貼文問起日本負面嘅地方。

樓主gatekeeper_deity發文問:「日本有咩好我都聽夠喇,想問下大家有咩令人反感之處」,估唔到網友們反應超熱烈!以下精選幾個原因,大家又認唔認同呢?

1.房細床窄

普遍日本酒店房都好細,理所當然張床同埋廁所都一樣咁迷你啦,好彩我哋香港人身型同日本人差唔多,但對於大大份嘅美國人嚟講又真係幾困擾嘅…

2.蹲式馬桶

據日本觀光局指出,目前4000個熱門景點嘅公廁,仍有4成使用蹲廁,但普遍西方人嫌蹲廁唔衛生甚至唔識用,所以日本政府將會於2020年東京奧運舉行前,將呢樣唔受歡迎嘅物件換成外國人習慣使用嘅坐廁。

3.吸煙文化

香港食肆全面禁煙已經好多年,但日本至今依然係行「分煙」模式,好嘅餐廳會分開樓層或區域,劃分為吸煙區同禁煙區,但事實上四周快餐店、親子餐廳都會見到日本人食飯時吞雲吐霧,令討厭煙味嘅遊客好難受,難怪好多外國人對「餐廳內可盡情食煙」都唔多like。

4.垃圾桶少

日本係一個非常乾淨嘅國家,但好多外國人都好奇怪,點解街上得咁少垃圾桶,咁啲垃圾掉去邊呢?根據日本人嘅觀念,條街本來係冇垃圾,垃圾都係人類自己帶出來,所以自己嘅垃圾應該帶返屋企/酒店處理,仲要分類回收。呢種咁重視公共衛生嘅傳統,全世界都應該向日本人學習!

5.逗留時間

不過獲得最多網友認同嘅一個「缺點」就係,「最後都係要走…」,唔只美國人,亦係香港人嘅心聲呀!!!

圖片來源:APA hotel

全職媽媽心聲!老公丟低屋企去追動漫明星

人哋話生仔要考牌,其實做人老公老豆都一樣,因為呢個世界上太多自私男人!

最近「LoveLive離婚」呢個名詞喺日本討論區2ch「孕婦板」引發話題,話說有位懷孕女網友發文大呻老公自私,終日沉迷偶像動畫《LoveLive!Sunshine!!》:「我個肚都7個月咁大,佢都堅持走去聖地巡禮!預產期5月,仲猛咁話話要去6月嘅演唱會!,令我腦中浮現『LoveLive離婚』呢個詞彙。」

網友紛紛留言,鬧到呢個老公狗血淋頭!孕婦網友繼續爆老公有咩過分行徑,例如間房塞滿動漫公仔、帶老婆去動漫電影相關地方、屋企狂播主題曲等…全職工作嘅孕婦表示身心疲勞:「男生都冇身為父母嘅自覺嗎?得閒買雜誌不如一齊睇嬰兒用品,我已經好累了,拎演唱會枝螢光棒敲佢個頭,佢會唔會醒呢?」

一個家要靠兩公婆共同付出及經營,如果有一方總係顧著自己,肯定會引起另一半不滿!唔少媽媽大呻屋企有個自私老公,唔知以下5種自私行為,你屋企個佬中唔中呢?

1.休息時間

老公收工就係食飯、上網打機,完全唔同小朋友玩,佢每日工作9個鐘大哂咩,我做全職媽媽工作24個鐘仲全年無休!有天只係提早瞓,叫老公湊細路,佢第二朝起身就鬧我做咩唔理小朋友,媽媽都係人唔係工人呀!

2.唔分擔家務

一個「返工好累呀」就可以將襪亂丟、飲料空罐放檯,完全唔理家務,當屋企係酒店,自己係老爺!

3.斤斤計較

買車、遊戲點數就好大方,叫佢買份禮物氹我開心就拖拖拉拉。亦有全職媽媽指老公認為每月畀基本家用就得,其他生活雜費從來唔主動畀錢,分分鐘工人姐姐都高人工過佢!

4.唔理老婆外家

有老婆表示自己屋企人去旅行總會買手信畀佢老公,埋怨老公旅行只會買手信畀自己兄弟姊妹,每次都為咗假日返娘家定婆家而嘈交。

5.唔避孕

做個負責人嘅男人,性事唔應該只顧自己開心,要老婆食避孕藥,自己唔帶套又唔肯做結紮手術。「佢話怕痛,我生仔夠痛咗幾次啦,佢痛一次都唔肯!」

圖片來源:[email protected]

露8隻牙最好?日本妹分享「露齒練笑」4式

世上應該冇咩男人鍾意黑面、成日嬲爆嘅女生吧,愛笑嘅女生先係最迷人最吸引!不過咪以為笑係一件易事,要笑得自然又好睇,唔係個個做得到!

早前日本有位女網友在 Twitter 上分享自己「練笑」嘅心得,佢話之前笑嘅時候,令人覺得「你根本冇笑」嘅錯覺,眼神空洞、嘴角好似抽筋咁,一年前決心要開始練習自己嘅笑容,有次唔覺意在網上睇到呢套笑容練習,原來標準嘅笑容,最好要露出上排8隻牙!

佢好貼心將呢套「笑容大法」用簡單插畫紀錄低,希望能幫到更多想擁有完美笑容嘅女生:

Step 1

對住鏡,上排牙齒緊緊咬住下唇

Step 2

輕輕將上唇肌肉向上拉,清楚見到自己嘅牙齦

Step 3

用力將嘴角肌肉往上提,直至感覺到雙頰開始有微微震動

Step 4

用盡力撐大雙眼,維持兩分鐘

堅持每日做15分鐘,一星期後基本就見到成效!

圖片來源:[email protected][email protected]

日本人正式告別OT文化?諗下好喇!

近年日本「社蓄」文化舉世矚目,當中員工因工時長以致過勞死,甚至自殺嘅例子亦偶有發生。嚟緊好快就會有套關於「加班問題」嘅日劇開拍,由外型清純甜美嘅傻大姐吉高由里子主演,劇名開宗明義叫《我,準時收工》(わたし、定時で帰ります。)。

故事改編自朱野歸子同名小說,吉高首度挑戰OL角色,於劇中堅守「唔會賭上生命去工作」嘅宗旨,每日都堅持準時放工,堅拒超時工作,不過唔代表佢做嘢hea,正因為想準時返屋企,佢比其他人更集中更追求效率,以唔麻煩同事為目標,劇集將於4月播出,相信會引起好多打工仔共鳴!

準時放工,係大部分打工仔遙不可及嘅願望!就算你極速K.O.晒所有工作,但意外就係意料之外,愈近放工鐘數,意外風險就倍數增加!到底點樣先可以避開公司耳目「早走」,同時遠離突發性工作?可以試試以下5個步驟:

1.編好劇本

首先要諗定起碼10個獨特又可以令你盡早離開公司嘅故事,唔好講「我今天有啲唔舒服」、「我想去睇醫生」之類,一聽就知流流哋,要詳盡仔細,例如「我大腿濕疹突然復發流哂血」、「我個胃抽筋,好似畀針拮咁痛」等,當不幸被捉到時,呢啲理由就大派用場喇。

2.保持低調

你可能習慣同事say bye,但為免露出馬腳,要保持低調唔可以畀大家望住你走,所以唔好用大門,最好走後樓梯或側門靜靜離開,走前最好留件外套喺椅背扮下嘢。

3.「扮」工檯之擺位

要令人經過你座位時,有種「佢應該去咗洗手間」嘅感覺,打開電腦,放支筆喺隔離,仲有半杯咖啡未飲完…保持電腦開啟或設計一個似「扮緊工」嘅screen saver。

4.心理質素

準時放工會內疚?諗下你腦細可能之前因為睇波而早走遲返,或你平日要等腦細收工先走得,都唔知等咗你幾多時間啦!

5.建立勤力形象

為要回覆嘅email預設發送時間,最好係正式收工前半粒鐘,令收到CC email嘅同事以為你仲做緊嘢,仲做到好夜添,畀人勤力工作嘅感覺,為下次早走作準備!

圖片來源:わたし、定時で帰ります

屋企無牙刷 AV只睇強姦類 日本妹細數千奇百怪前男友

隔一排日本twitter就會有類似「緬懷前男友」嘅話題,繼之前「年度最強渣男」後,最近有一個「#元カレと別れた決定打(決心與前男友分手的理由)」浮面,究竟有咩理由足以令女生們忍痛要分手呢?

等我精選以下較有話題性嘅原因畀大家,突然覺得自己好好彩,冇咩遇到呢啲咁有「風格」嘅男生!

1.戀母情結

「到男友屋企時佢喺近門口個窗講「直接入嚟~」點知一入到去見到佢瞓喺阿媽大脾,阿媽幫佢撩緊耳屎,見到我都冇停低嘅打算。」

2.性事問題

「做愛時要求我要大聲叫到附近嘅人都要聽到」

「私藏AV都全部係強姦類內容」

「嗰度嘅size同大拇指一樣」

「性慾太強」

3.個人衛生

「唔刷牙,發現佢屋企冇牙刷。」

4.珍惜食水

「唔畀我浸浴。沖澡先5分鐘就燥底問我『到底要沖到幾時?浪費食水』」

「鬧我好沖馬桶,啲水費好貴,『屋企點教妳架!」

5.送禮

「送我嘅禮物都係佢媽揀。」

「第一年聖誕節約會前,佢寫咗3張便條紙畀我,話想要2萬日圓嘅禮物,結果交換禮物時佢回我一個爛鬼唔值錢嘅玩具。」

6.渣男

「交往5年對30歲嘅我講『咁想結婚請你搵第二個』」

「男友妹妹傳來嘅照片發現佢同時劈腿7個女生。」

「完全唔知佢已經結婚仲有小朋友」

7.罪犯

「突然失聯原來係畀人拉咗」

「偷內衣被捕,仲要係慣犯」

「原本仲好疑惑男友不過係普通上班族點解咁有錢,之後就因為詐騙被捕」

8.豬咁蠢

「前男友蠢到連地球係圓都唔知!」

圖片來源:日劇《高嶺之花》

日本女人唔鍾意男人要找錢:斤斤計較

畀錢買嘢時,好多時會畀整數錢方便店員找,不過呢個咁貼心嘅行為喺日本妹眼中,竟然係核突嘔心!

早前有男網友於日本論壇2ch發文:「埋單畀680円時,我拎1180円出嚟,隔離女生話我好嘔心!」男生原意都係想方便店員齊頭找500円啫,喺香港都好常見呀,乜好核突咩?

呢個post立即引起網友激烈討論,亦掀起兩派網友一場舌戰,支持女生一方:「唔用電子貨幣都算,用現金都仲要計到盡真係好嘔心」、「仲核突過用優惠卷」…女網友嘅評價不外乎係核突、太小家,覺得男人會係一個斤斤計較嘅人。

幸好樓主is not alone,有一班巴打支持佢:「呢條女智商太低,唔駛理」、「係我就一腳踢開佢叫佢就收嗲啦」、「純粹唔想袋住一堆神沙,冇咩唔妥」,亦有人好理性從數學角度分析,幻想遇著計數唔叻嘅豬店員,情景就會變得好尷尬。

講開找錢,去日本買嘢零舍多散銀,不過大家有冇留意,就算再多散銀,收銀員找錢嗰陣都唔會令你手忙腳亂?有日本人就畫咗以下呢個收銀流程插圖出嚟:首先數完紙幣俾你睇,等你袋好再找碎銀,碎銀仲會放喺單據上面,方便你一嘢倒入散銀包,就係最正確最方便嘅找錢方法,講貼心都係唔夠日本人嚟!

圖片來源:[email protected]_Shiroh、www.pakutaso.com

一句激嬲老婆!日本天書教老公激嬲老婆之解答妙法

做人老公甚艱難,每講一句說話都要好謹慎,因為隨時會激嬲老婆,造成唔程度嘅嚴重災難。有見及此,最近日本一本名為《妻のトリセツ》(老婆的使用說明)嘅書喺多間媒體、節目介紹下引發話題,晨間節目「スッキリ」仲現場請作者解讀老婆生氣時嘅各種反應,同埋應該點樣應對。

作者兼腦科學家黑川伊保子直接點出問題關鍵,在於男女思考模式不同,女生「希望男生能夠自己察覺」但男生卻認為「你唔講我點會知」,老公根本唔明老婆嬲乜,於是節目就以書中3個實例來解讀老婆生氣時講嘅嘢、做嘅反應所隱藏嘅真正含意。

1.當老婆講「覺得最近腰痛」

咁老公模範解答係咩?如果老公答「去睇醫生」或「去按摩」,老婆唔駛一秒即「著」!因為男人屬於「問題解決型」,先諗解決方法,但女生希望係先獲得「同感」,所以最佳答案係「咁你一定好唔舒服喇,有咩我可以幫到你嗎?」

2.當老婆洗碗時咳嗽,老公不聞不問淨係坐喺梳化掛住睇電視,老婆好忟咁講「點解你唔幫吓手?好唔貼心」

作者認為老公最佳答案應該係「對唔住我冇注意到,應該要我去做先啱」。

3.當老婆捱眼瞓等夜返老公

某日老公因為工事遲返屋企,一直捱眼瞓等老公嘅老婆忍唔住開始翻舊帳:「第一次約會你又遲、傾婚禮事項時又係,就連個女嘅七五三(日本神道教傳統習俗)你都話要開工…」此時老公要答:「對唔住,令你有咁多唔好回憶」。好似有啲無理取鬧?作者解釋男人唔係要對「遲到」呢個事實道歉,而是要為令女生感到「悲傷」而道歉。

跟住作者又特別舉例幾句女生激氣時常講嘅說話,解釋背後含意

1.鬧交時講「你走開!」

內心獨白:「我因為你嘅過錯而受傷!同我道歉!安慰我」

2.問老婆有冇嬲:「冇呀!」

內心獨白:「我好嬲,你唔係唔理我呀?」

3.老公責怪老婆時,佢講「全部都係我錯…」

內心獨白:「吓?我錯?我唔啱?根本就係你錯啦」

女人心,海底針…係冇錯架。

圖片來源:www.pakutaso.com