港女講日:脫單不是夢!阻礙戀情嘅5大壞習慣即戒

「咩話?乜仲有人玩Pokemon Go咩?」呢句應該係精靈訓練員最討厭聽嘅說話。你唔玩唔代表其他人唔可以繼續玩!日本有一對新人因為捉精靈而捉到好姻緣!近日仲搞咗一場超夢幻《Pokemon GO》主題婚禮呢!

故事主角Shibu及Lily都係《Pokemon GO》超級玩家,兩年前於東京台場捉背背龍時偶遇並相愛。兩年後二人決定走入人生另一階段,大婚當日從會場佈置到婚禮儀式,都貫徹《Pokemon GO》主題,新郎將一段以Pokemon RPG風格製作嘅成長片段放上網,短短幾日已有接近150萬播放點擊率,連遊戲開發商Niantac亞太區營運總監川島優志睇完條片都大讚very good!

據聞呢對新人捉到嘅精靈數量超過10萬隻,各位單身嘅精靈訓練員想脫單,唔該你哋捉得落力啲啦!(誤)

雖然單身都可以好開心,但講真,一個人生活得太耐,點都想有個人可以陪下自己。好多單身女生習慣自憐自怨,其實單身主因可能關你性格事,不如試下戒掉一啲壞習慣,話唔定聽日就會有艷遇!

1.負面思想

冇人會鍾意同一個負能量爆登嘅人一齊,所以,想有人接近,先要改變充滿負面情緒嘅一面,戒掉盲目埋怨一切嘅習慣,令對方唔拒抗與你相處。

2.過分獨立

就算你有高經濟能力,慣性自己解決問題,但唔好唔記得,你係一個女人,聰明女生識得在異性面前扮演「柔弱」角色,間中依賴異性,勾起男生嘅保護慾。在男人面前表現得「太強」從來唔係一個優點。

3.難以捉摸

面對心儀對象,令對方覺得你難以捉摸並唔係調情方法,反而有可能會阻礙戀情。女生要適當表達自己情緒及想法,好似約會完結,如果你收埋自己開心嘅感覺,對方可能會誤會你對佢冇興趣,未必會有下文喇。

4.缺乏自信

好多女生對愛情冇安全感,由於對自己冇自信,於是質疑對方係玩家、騙子等等,雖然有警覺性同保護自己係好事,但如果疑心太重好易會趕走對方,不知不覺冇咗發展機會。

5.宅女

就算唔係以脫單做目標,但識多個朋友都唔係壞事,一來可以消磨時間,二來認多啲朋友嘅朋友,擴闊生活圈子,多啲出席飯局,參加興趣班等,有時間就去中同小同聚會,好多人都係從呢啲途徑認識另一半。

圖片來源:[email protected]

港女講日:日本兩成人悔婚?結婚做好5個心理準備

11月22日係日本「好夫婦日」(取諧音「いい夫婦」),最近日本保險公司「明治安田生命」趁機公布一篇婚後感情調查,開門見山就問起大家覺得婚後生活圓唔圓滿…

當中有超過7成(75.3%)自認婚後生活算係圓滿,比例都算高呀,奇就奇在,當問起如果重新考慮,仲會唔會同同一個人結婚?只有唔夠一半(42.6%)嘅受訪者表示「會」,但亦有兩成多(22.1%)認為「唔會」!

即係話,婚姻美滿還美滿,但有得揀又唔想同返現任先生或太太結婚?點解呢?因為婚姻比想像中複雜同深奧得多,如果唔想後悔,結婚前要做好心理準備,先知自己係咪ready!

1. 現實破壞婚姻憧憬

婚後好似電視劇咁,過住好sweet同居生活?唔好意思,現實往往係殘酷。組織一個家庭需要兩個人一齊努力,首先碘煩係開支問題,一齊住後咩都係錢,你會突然發現原來日用品一啲都唔平,所以婚前最好先與對方計劃好雙方負責嘅開支,有共識至可減少爭拗,無謂講錢傷感情。

2. 對方變得面目可憎

結婚時覺得對方係一生最愛,但婚後對方嘅醜面目出哂來。畢竟共同生活係婚後最大挑戰,兩個唔同生活習慣嘅人住埋一齊,自然出現好多「睇唔過眼」嘅問題,磨擦增加,就算小事都可引發世紀大戰!千析唔好睇少小事,有時積少成多,唔解決就會爆煲,記得溝通係最佳解決方法,百忍唔會成金。

3. 謹記另一半唔係工人

結婚後唔單止金錢問題頭痕,一大堆家務鎖碎事,絕對係拗交源頭。婚後唔可以事事靠家人,心態都要調整,唔可以完全依賴另一半,因為好易影響雙方感情。最好先商討雙方家務工作分配,盡量磨合。

4. 互相扶持最重要

夢幻婚禮過後,你可能會沉醉於感動而開心嘅嗰一晚。但記住,結婚同拍拖唔同,比起點樣令對方開心,點樣陪對方走過低潮更重要!面對生活壓力、突發情況,甚至係健康問題,你做好心理準備陪對方面對嗎?

5. 重投平淡生活

結婚前就想日日見,婚後唔係話一定唔會有浪漫小情趣,而係雙方會由戀愛時心動、激情變成家人般嘅感覺,係唔同層次嘅關係。萬一真係有後悔感覺,不妨回想當時與對方開心浪漫嘅感覺,有時件事可能冇想像中咁差呢。

圖片來源: www.pakutaso.com

港女講日:日本盛傳8.2秒法則 8秒就夠愛上一個人?

一向吸引唔少男粉絲嘅有村架純,近年幫CITIZEN「wicca」手錶拍過好多可愛廣告,好似「動物系女子」、「女生真心話翻譯機」等主題均令人印象深刻,最近一輯廣告同樣大sell可愛,令唔少宅男高呼戀愛了!

廣告圍繞「8.2秒法則」,即係咩?日本網站《by-s.me》曾經做過一項統計,兩個陌生人只要能夠對視超過「8.2秒」就算係一見鍾情,雖然彼此唔認識,但8秒內足以產生心動感覺!如果對方並唔係你心儀對象的話,視線喺佢身上就唔會停留超過5秒。

呢8秒入面,其實男生已經依照對你外表嘅喜愛程度做好評分,女生就會由對方散發嘅氣息來分析對方個性。突然覺得大腦好神奇,8秒可以做到咁多嘢!

此外,調查亦指出,因為一見鍾情而成為情侶嘅機率大概有55%,而成功結婚嘅男女,離婚率只有20%以下。可見一見鍾情嘅婚姻,幸福指數好似幾高呀!

講返個新廣告,「約會篇」主題好簡單,就係同有村架純來一場甜蜜約會,以男友視覺手法拍攝,好似真係同有村一齊去咗親親大自然同埋行街食飯咁,有村仲要喺鏡頭前扮餵你食甜品、嘟咀扮嬲,我身為女人都覺得心動呀,計我話邊駛8秒,男人一眼望住佢就已經起哂痰啦!

圖片來源:wicca

港女講日:日本人妻分享婚後平淡又甜蜜二三事 網上爆紅?

俗語話,婚姻係愛情墳墓,結婚愈耐,當初嘅熱情愈淡。其實邊個話㗎?只要兩人一齊努力,平淡生活都可以過得好精彩!

日本呢位幸福人妻就係最佳例子!家庭主婦のるん(@nononorn2),本身唔係咩名人,佢只係成日喺twitter分享與老公嘅日常生活,就已經令網友覺得非常感人,簡簡單單卻有滿滿的愛。以下精選幾個小故事畀大家:

1.小驚喜

倆口子經常會畀對方鼓勵同埋小驚喜,處處為對方著想。例如某日老婆有排KitKat未食完,隔日拎嚟食就發現老公喺包裝背面寫住「我愛你」,好簡單但又係最窩心嘅舉動!

2.回到熱戀時

女生最愛聖誕節,雖然只係11月,但屋企已經擺放聖誕樹,呢對恩愛夫妻夜晚仲扮未結婚前出席聖誕約會嘅情景,夜深人靜時細細聲播住聖誕歌浪漫一番。

3.人肉枕頭

某晚老婆失眠,於是挨住老公隻手,原來老公都未瞓著,好溫柔咁講:「好啦,係唔係咁樣你先瞓得著?」然後伸出手臂畀老婆做枕頭,再攬住老婆一齊瞓。

4.可愛老公

老公朝早幫老婆沖咖啡,老婆回句「多謝」,老公話唔駛多謝,順便咋,但後來又改口話係專登幫佢沖,自己嗰杯先係順便…然後用杯遮面扮怕醜;有日老婆切洋蔥喊哂口,老公好man咁講「邊條粉腸搞喊我老婆?好啊(指住洋蔥),睇我點教訓你!」呢個老公好可愛呀!

5.互相稱讚

問老公晚餐想食咩,佢從唔會講「隨便是旦」之類嘅說話,而係因應雪櫃有咩食材,兩人一齊決定食啲咩,飯後當然不忘讚老婆煮得好好食啦!互相誇獎對婚姻真係好重要,因為對方各種欣賞讚美,先至會有動力去努力經營呢一頭家!

6.稱職爸爸

某晚老婆發高燒,整唔到晚飯同埋囡囡返學個便當,老公二話不說做起「一家之煮」,囡囡個便當仲整得一啲都唔失禮!老婆好返少少後同老公講對唔住,老公好型咁講:「我正職是呢個家嘅英雄,出去返工係我嘅副業!」

或者好多人覺得呢啲事好基本好濕碎,但當你理所當然認為對方係要咁做時,好易會唔記得應該要稱讚同埋感謝對方,時間耐咗,兩人關係好易就會變得冷淡㗎喇。

圖片來源:www.pakutaso.com

港女講日:日本流行用語大測試!2018潮語你識幾多?

臨近年尾,又係唔同類型嘅年度排行榜出爐嘅時候!「2018新語、流行語大賞」係由日本自由國民社主辦嘅年度票選活動,由1984年開始到而家,每年都會揀出反映當個年度社會現象,範圍涵蓋時事、體育、流行文化等,預計將於12月3日公佈十大流行語。唔知今年有咩最新潮語入圍呢,以下呢幾個熱門字眼,哈日族又熟唔熟?

1.《屍殺片場》(カメ止め)

有冇人聽個名以為又係恐怖喪屍片?呢部以低成本拍出來嘅電影,居然大收近30億日元超高票房,個個都話要捱30分鐘悶場之後就會笑爆肚,我仲未得閒去睇呀,唔好劇透!

2.金足農旋風

今年甲子園舉辦嘅日本全國高中棒球錦標賽,一隊不知名嘅農業學校金足農爆冷成為黑馬,由一開始冇人睇好到最後勇奪亞軍,係今年日本球迷們覺得,最青春熱血嘅棒球比賽故事。

3.虛擬貨幣/暗網 (仮想通貨/ダークウェブ)

日本虛擬貨幣交易所Coincheck,年初被黑客盜取總額達580億元NEM虛擬幣,其後呢啲錢流到暗網交易,故暗網被認為係犯罪收益嘅溫床。

4.大叔的愛 (おっさんずラブ)

日本熱播嘅BL神劇,香港都有唔少粉絲追看,劇情勁爆笑!朝日電視台以同性愛情為主題播放嘅電視連續劇,打破以往男女相戀嘅劇情,連帶劇中飾演男主角春田創一嘅田中圭人氣爆登!

5.《你想活出怎樣的人生》(君たちはどう生きるか)

原本係作家吉野源三郎於1937年推出嘅作品,透過一名15歲男孩嘅經歷,吸引讀者了解並反思人生各種狀況,呢兩年由羽賀翔一改編成漫畫,銷量達200萬本,除咗係今年嘅暢銷書籍,聽聞宮崎駿亦想將呢部作品變成動畫。

6.GAFA(ガーファ)

即係Google、Apple、Facebook、Amazon四個美國科技界龍頭嘅簡稱,幾年前外國有學者推出以GIGA為主題嘅書,話畀大家知咩係GAFA,以及點樣利用GAFA等,呢本書《THE FOUR: The Hidden DNA of Amazon- Apple- Facebook- and Google》今年喺日本推出翻譯版,成為暢銷書籍,各大報章雜誌一致好評。

7.肌肉唔會背叛你(筋肉は裏切らない)

係NHK電視台體操節目《大家的肌肉體操》嘅標語,用嚟鼓勵觀眾鍛鍊身體。今年8月開始由肌肉猛男做示範,觀眾反應非常熱烈!不過我第一次聽呢句說話,係因為藝人天海祐希曾經上節目講「男人會背叛你,但肌肉不會背叛你」,令我印象好深刻!

8.電子競技 (eスポーツ)

電競被列入為2022年亞運會正式比賽項目,可惜日本奧林匹克委員會理事表明唔會承認電競屬於運動。不過越來越多地方將會加入電競作為比賽項目,唔少日本玩家希望電競早日普及,追上美、韓等電競先進國。

9.惡質擒抱 (悪質タックル)

美式足球用語,指比賽過程中擒住並摔倒對方,但衝撞都有分係唔小心定惡意,今年5月日本大學就喺比賽中惡意犯規,令關西學院大學選手受傷入院3星期。事後犯規選手公開謝罪,大爆教練強迫學生進行激烈攻擊,引起民眾憤怒。

10.路怒症 (あおり運転)

因塞車、見到唔守規矩嘅司機、後方車輛惡意喇叭聲…駕駛者往往會產生憤怒及緊張情緒,導致言語或肢體衝突。日本單係今年上半年就多達6千宗路怒症案件,比去年同期高2倍,於是今年警察開始加強管制,希望唔會再發生車禍。

圖片來源:《大叔的愛》

港女講日:戀上「媽寶男」?學識3招搞掂裙腳男

相信大家細個生病時,爸媽都會陪你去睇醫生。但係如果你過20歲後仲要阿爸阿媽陪你睇病,分分鐘令醫生都睇你唔起!

身為大阪市立大學理事長嘅醫學博士荒川哲男,近日寫咗篇文章題目名為『醫生話你知「呢種患者最討厭!」~陪住成年子女一齊睇病嘅父母』,表達咗對於虎媽同埋裙腳仔嘅不滿。

指出醫生問診需要觀察病人嘅反應同埋口述,一直幫仔女發言嘅媽媽會害醫生冇辦法順利診斷,另一方面有啲病人即使已經成年,又真係唔識表達自己有咩症狀,所以怪獸家長同埋裙腳仔都令醫生好頭痛!!!

醫生指呢班成年人「有可能係母原病」,「母原病」係日本精神科醫師創造嘅名詞,就係唔識教小朋友嘅媽咪用自以為是嘅教育方式,以為對小朋友好卻反而令佢哋身心異常,日本仲有幾個比較白話嘅類似詞彙如「毒母」、「毒親」,即係我哋講嘅虎媽!

男人天性有戀母情結,佢哋孝順、尊敬阿媽,基本上咩事都聽媽媽的話,作為媽咪,有咁嘅仔當然開心啦,但作為老婆,最怕男人係「媽寶男」!不過愛情魔力比咩都強大,萬一真係無法自拔地愛上一個有戀母情結嘅好男人,想令佢愛你多過佢阿媽,首先要知道點樣吸引佢!

1.認同佢對媽咪嘅愛

唔係叫你同佢一樣盲目咁愛,而係避免批評佢順從媽咪行為及決定。所有男人都希望另一半同佢同一陣線,如果平日佢有啲關於「戀母情結」小事,你都表示支持認同,到佢真係出現一啲over咗嘅「戀母情結」行為,你就可以一位通情達理嘅老婆身份去同他講道理,咁樣佢會肯聽你講,甚至反過來站喺你立場去諗。

2.學識煮「媽咪味道」飯菜

常言道想抓住男人,先抓住男人個胃!煮飯方面肯落功夫,摸清老公口味輕重,當中一定要包括佢最鍾意嘅「媽媽味道」菜式。

3.討奶奶歡心

同戀母情結男結婚,更加需要得到佢媽咪嘅認可。基本上每次見面時都要有禮貌,早晨、多謝、唔好意思、對唔住等等一定要識講。

圖片來源:www.pakutaso.com

港女講日:薑愈老愈辣!睇時尚婆婆IG學打扮之道

時裝從來唔係年輕人專利,就算上咗年紀成面皺紋、一頭白髮,同樣有追求時尚打扮嘅權利!

近日網友モモ(@goodmoomin)於twitter分享媽咪穿著打扮,意外地成為網友瘋傳嘅post。從相片可見,媽咪以一身黑白主色調穿搭,再戴上後生女最鍾意嘅繽紛飾物,成個look有型得來又帶點童真,最重要係就算媽咪一頭白髮,依然carry到呢個look!原來呢條裙係媽咪20年前買落,重要係Yohji Yamamoto(山本耀司)出品,唔怪得啦,原來後生時已經咁有品味!

呢位至潮媽咪亦非常緊貼潮流,有開IG(@masako_kojima_desu)分享日常穿搭,仲有成過萬followers呢!Masako鍾情簡約打扮,顏色以黑白灰及earth tone為主,不過服裝越簡約,就越突顯小物搭配嘅重要性,原來Masako仲鍾意handmade飾物添呀!

各位女生想參考熟齡穿搭,除咗參考Masako,以下呢幾位都係外國出名有時尚品味嘅「銀髮KOL」,一樣可以啟發你穿衣靈感!

1.Lyn Slater (@iconaccidental)

年屆64歲,原本係社工系教授,因為在紐約時裝周期間路過Show場而被錯認為明星而意外走紅,簽咗Elite London Agency正式出道做模特兒,更開設Accidental Icon網誌及社交平台,進軍KOL界。Lyn擅長玩黑白monotone,與一頭標誌式銀白短髮超夾,有型到不得了,一眼就認得出!

2.Baddie Winkle(@baddiewinkle)

來自美國肯塔基州,現年87歲嘅Baddie Winkle,真名Helen Ruth Van Winkle,因3年前曾孫幫佢影咗張身穿紮染Tee及牛仔短褲、比yeah手勢嘅相,在網上得到熱烈迴響,曾孫乘勢幫佢開Twitter同Instagram,而家followers多達3.3M!Baddie 服裝多以90年代元素為主要穿搭靈感,糖果色、浮誇小配件老是常出現,真係後生女都唔夠佢嚟!

3.Iris Apfel(@iris.apfel)

可以話係全球最老KOL!生於美國嘅Iris今年已96歲高齡,後生時係室內設計師,2005年84歲那年在大都會藝術博物館搞服飾展覽,因佢嘅outfits顏色、服裝材質及圖案搭配巧妙而受矚目,同年成為世界知名fashion icon,擅長色彩繽紛穿搭及誇張飾物配襯,大圓框眼鏡及紅唇係個人標誌式,風格獨特令人過目不忘。

圖片來源:https://twitter.com/goodmoomin

港女講日:「好想同你組織家庭!」男人真心想結婚嘅10大理由

今年日劇《大叔的愛》爆紅,令默默耕耘多年嘅田中圭人氣爆燈,最近仲接替已故男演員大杉漣成為綜藝節目《多謝請客》固底班底,不過最近就因為一段發言,引起網民不滿。

呢集節目談及結婚生活嘅話題,主持人問田中「點解當初決定結婚?」田中答:「我當時係奉子成婚,所以其實仲有好多其他選擇。」相信田中唔知自己會變成「炎上」主角,繼續講:「仲想繼續有更多工作、更多人氣,更受女生歡迎…再繼續玩。想做嘅事太多,多到唔識揀,於是我問自己『當下最唔想失去係咩嘢?』答案係我老婆,所以決定結婚。」

事後呢段發言引來兩極評價,有粉絲覺得田中好誠實,冇顧慮太多只係將當時最真實嘅想法講出來,大讚「田中圭太型喇,佢老婆真幸福。」

同時卻辣㷫一班女觀眾,「搞大人個肚之後就話仲有好多結婚以外嘅選擇,即係叫女方墮胎,又或者唔結婚要女生做未婚媽媽?自己就想繼續玩算點呀」、「雖然聽起來好似好sweet,但站在懷孕女性立場,對肚入面嘅BB竟然有「要/唔要」嘅選擇,好難令人接受!」

當然亦有網民認為田中只係表達自己當時嘅心情,重點係佢而家家庭幸福就得啦。其實田中唔係因為女友大肚而想負責任,佢係唔想失去老婆而真心想結婚,咁都畀人話係渣男都幾唔合理。

隨住年齡增長,尤其係女人,對「結婚」兩字特別敏感,咁究竟男生到咩時候會有「真心想結婚」呢個意識呢?

1.想過安定生活

就算係冇腳雀仔,到咗一定年齡,加上收入穩定,想停低建立一段固定穩定嘅關係,組織自己美滿家庭。

2.覺得寂寞

一個人食飯,返到屋企冇人等自己…男人都會感受到孤獨感,好想有另一半照顧,想有一個人可以喺隔離陪住自己。

3.好朋友都結哂婚

見到朋友婚後生活咁開心幸福,好自然會幻想自己結婚後嘅生活,加上接觸到朋友或兄弟姐妹嘅小朋友,覺得好得意,好想擁有自己兒女。

圖片來源:《無法成為野獸的我們》

港女講日:一開就想反眼!5種令人扯火嘅WhatsApp回覆

WhatsApp、LINE等通訊apps係日常不可缺少之物,公事私事以msg來回方便又快捷,亦引申唔少「通訊社交禮儀」爭辯。唔知幾時開始,「秒回」變咗其中一項基本禮儀。

日本幾間主要電訊公司包括NTT、KDDI、Softbank等,近日聯合推出關於「秒回風氣」嘅廣告,廣告道出「只因為冇秒回就失去嘅,根本唔算友情」,令好多曾經因為冇立刻回覆訊息就激嬲友人嘅網友非常有共鳴。

有時真係太忙,好難每分每刻機不離手,個人就認為「冇秒回」未算討厭,以下幾種神回覆,先至最易令人一睇就扯火!

1.「喔/哦/嗯/唔/ic」

收一次半次都無所謂,如果經常收到同一個人講呢啲話題終結字,再多熱情都會冷卻,唔會想同佢開新話題講。不過如果你想對方唔好煩住你,但又怕得罪對方,則可靈活運用!

2.「哈/哈哈/笑喊emoji」

真係有咁好笑有咁傷心嗎?通常打呢啲hea爆回覆嘅同時,8成人都係木無表情,一啲笑容都冇,心內只有唔耐煩。

3.「noted/noted with thanks」

你估公司電郵咩,駛唔駛加上款、下款、祝福語?

4.「是但/無所謂/你鍾意」

唔只通訊apps,其實任何情況下都係最令人「扯火」嘅回覆,毫無貢獻,真係想反檯!

5.錄音怪

自從有語音功能後,簡直係一眾唔鍾意打字嘅朋友嘅天大喜訊。不過,當你唔方便聽錄音,好似開緊會或睇戲中途,明明只需簡單答「好/唔好」、「OK/唔OK」都要錄音,何苦呢?打一兩隻字有幾難?一打開個chat,見到成版都係錄音檔,真係忟到想掉爆部電話!

圖片來源NTT

港女講日:小心踩地雷!日本網咖店員力數西客之缺德行為

西客度度有,有日本網友於twitter分享於漫画喫茶(即網咖,可上網睇漫畫同埋沖涼過夜)打工嘅嘔血經歷,睇完相信你寧願住晚酒店,都唔會慳錢去網咖過夜!

曾於網咖打工長達3年嘅網友Kima(@kima1221)離職半年後,將當時遇過嘅各種西客變成漫畫,於twitter上分享,近萬人like、多達9千多人share!

雖然Kima打工嗰間網咖用上黑色裝潢、座位寬敞,好似好高格調咁,但遇到嘅客人水準就超低!以下3種西客驚嚇行為就令佢非常深刻!

1.走數

因為客人離場前先要埋單,所以成日都有冇帶但又已享用服務嘅西客。Kima話曾經有位女客人冇錢找數又冇帶證件,唯有報警,最後客人抵押手機再返屋企拎錢,結果竟然過咗約定日期半年後先返嚟找數,但佢完全冇表現出唔好意思、反省嘅樣。

2.周圍痾

話說某員工於其中一個包廂發現便便,徹底打掃後,間房仲禁用咗一排,但周圍大便嘅西客陰魂不散,連走廊都有!大便之外,亦有客人試過留低一攤尿漬,甚至下身赤裸坐喺櫈上瀨尿都有!!!

3.性交

身為一個大人,唔可以喺公共場合發生性行為係常識吧!Kima話外表越普通,越有可能在店內搞!店家除咗會收取應收嘅費用,亦會登記客人證件,以後不得再入店消費。但某對因發生性行為而被驅趕嘅情侶以「只使用30分鐘」為由,拒絕畀3小時包箱費,仲反控店家冇事先告知唔可以在店內性交!

唔少網民睇完呢幾個西客缺德實錄,表示超有同感:「我撞過客人在逃生梯痾屎、因為打輸麻就打爛牆壁、或者將件沾有血跡嘅毛衣丟落垃圾桶」、「我之前喺K房打工,情侶客人離開後通常都會掃到用過嘅保險套,或者係女生將保險套丟入女廁垃圾桶之類」。

圖片來源:enjoytokyo.jp