女神朱千雪IG上載素顏照 零瑕疵美肌獲網民激讚

image

2012年民選港姐朱千雪(Tracy),入行後一直獲無綫力捧,深受觀眾喜愛。自從佢選擇向無綫請假重返校園增值自己,先後修讀企業傳播管理系碩士及法律系博士課程,大家就好少睇到佢嘅作品。大家都係靠佢平時係社交網站上載既相知道佢嘅近況,噚日千雪BB上載左一張全素顏相,寫住「My I got up for work at 4:30am face 😛 On days I work, I prefer to start early and end early. On days I don’t, I prefer to sleep through the day 😂🐷」

素顏相真係唔係個個夠膽曬,但一向美貌與智慧並重嘅千雪BB竟敢一臉素顏,連唇膏都冇塗,佢嘅皮膚白裡透血。唔少網民都大讚佢,紛紛留言話:「天生麗質❤️❤️❤️❤️」、「素顏都咁靚👍🏻👍🏻👍🏻support」、「女神真係好靚」、「妳好pure呀」、「皮膚好好」、「嗰年應該係你攞冠軍」及「素顏氣質美女😜👍👍」等等。

image
image
image
image

【股民睇路呀】秋官新劇《詭探前傳》下週一首播 重溫「丁蟹效應」殺傷力

image

雖然話嚟到21世紀唔應該咁迷信,不過有時有啲嘢,真係唔輪到你唔信 。呢個世界真係有好多事情係解釋唔到,其中一個就係唔少股民,甚至連外國投資者都聞風喪膽嘅「丁蟹效應」!自從1992年劇集《大時代》播出開始,之後每逢有鄭少秋(秋官)嘅出現,「恒指」都會有唔同程度嘅跌幅。由秋官、陶大宇、江若琳、麥子樂、陳安立及游學修等人主演ViuTV靈異題材新劇《詭探前傳》將於喺下星期一晚上10點首播,今日就同大家重溫一下過往「丁蟹效應」嘅數據啦!

image
image

例如:
1992年 《大時代》-播出後一個月內跌1283點。

1994年 《笑看風雲》-播出後一個月內跌1976點。

1995年 《男人四十一頭家》-播出後五日跌505點。

1996年 《天地男兒》-播出後一個月內跌1254點。

1997年 《江湖奇俠傳》- 播出後一個月內跌2842點。

1999年《神劍萬里追》 - 劇集開播時恆指升到14500點,不過一個月內跌咗2084點。

2000年 《世紀之戰》-播出後八日跌咗2469點,之後一個月內累積跌2900點。

2003年 《非常外父》-播出後兩日內跌681點。

2004年 《血薦軒轅》-播出後四日跌843點,之後一個月內累積跌1482點。

2006年《潮爆大狀》-劇集播出時恆指未能衝破17000點,仲回落到去16500點。劇集播完後四日後,恆指喺一個多月內急挫,最多跌2097點。

2007年 《謎》- 劇集5月中首播,去至5月尾累積跌795點。

2007年 《一擲千金》- 播出月內恆指最高跌2900點。

2008年重播《楚漢驕雄》 - 10月喺早上,10月10日嗰個星期恆指跌咗2886點。

2009年《桌球天王》 - 喺首播日跌咗706點。雖然劇集播出期間,恆指上咗1802點。不過喺4月7日嘅節目中,秋官就警告話「投資涉及風險,你小心,別亂來」,之後翌日嘅股市即刻跌咗440點。

2012年 《心戰》 - 喺播出宣傳片時已經跌咗549點,之後嗰八日仲一共跌1574點,去到首播日都未跌完。

2013年《忠烈楊家將》 - 電影首映第二日跌610點。

2015年重播《大時代》 - 重播第一集已跌558點。

2017年 - 秋官宣布舉行個人演唱會,之後港股連跌3日,一共跌276點。

「丁蟹效應」有幾威力強大,相信都唔少再多講。唔知今次播出《詭探前傳》可以可以打破「丁蟹效應」呢個宿命呢?

「安心偷食」後終蒲頭 黃心穎現身洛杉磯機場

image

自從「安心偷食」事件爆出後,男女主角許志安及黃心穎形象插水。黃心穎早前喺社交網站發道歉文後,行蹤一直成謎。到今日黃心穎終於現身啦!有傳媒報道指佢同一名女友人喺香港時間今早11時40分現身洛杉磯機場。

打扮樸素嘅黃心穎,只係著咗一件黑色衛衣配上卡其色褲,戴上cap帽同口罩嘅佢,由於坐完十幾個鐘頭飛機,所以見到佢有啲疲態。被傳媒發現後,記者就追問佢去美國係唔係避世及同馬國明仲係唔係情侶關係等等嘅問題,不過心穎就冇回應,淨係耷低頭,拖住行李咁去搭車。去到的士站排隊時,記者繼續追問問題,不過佢就擰轉身避開鏡頭,繼續冇回應問題。最後等到的士後,心穎就同友人搭的士離開。

image
image
image

《鐵探》飾演警察入型入格獲網民讚賞 原來蔡思貝有個警察爸爸

image

無綫皇牌重頭劇《鐵探》正在熱播中,收視口碑同樣叫好。劇集緊張刺激、充滿劇味及雲集唔少好戲之人,除咗有惠英紅、姜皓文、許紹雄(Benz雄)及黃智賢等人大鬥演技之外,仲有飾演警察招喜悦嘅蔡思貝亦被指演技大爆發,被網民大讚演得入型入格。

image
image

喺《鐵探》開頭,蔡思貝首先以揸雷身份出現,喺街邊賣毒品,之後被尚垶追逐,最後借機逃脫。之後,佢再以卧底身份出現,佢更加以身試毒,令身體不停抽搐,逼真嘅演繹,獲得網民讚賞。好彩最後冇事,佢被調去交通部,後來仲被調去重案組,同垶Sir(袁偉豪飾)及快活谷(梁競徽飾)等一齊查案。喺劇中,蔡思貝有唔少危險動作,不過佢都全力以赴。

image
image

入行就嚟五年嘅佢,原來已經飾演過幾次警察角色,除咗《鐵探》嘅招喜悦,仲有《鐵馬戰車》嘅貝心柔、未出街嘅《機動部隊2019》阿芯及《機場特警》辛凱晴。佢除咗同警察角色好有緣之外,其實佢爸爸就係一位警察。自細喺警察宿舍長大,細細個仲隨住爸爸出入警察學校所以佢對警察嘅工作一啲都唔陌生,唔怪之得佢飾演警察咁入型入格啦!

image

蔡思貝喺2013年參選港姐獲亞軍後入行,加入無綫後即被力捧,喺2014年劇集《名門暗戰》及《八卦神探》擔任女配角,2015年就即升呢做女主角,不過劇集角色係做衝動嘅新人角色,加上當時演技幼嫩、講對白多懶音、把聲又太尖太嘈,令好多觀眾唔鍾意睇佢嘅演出。2016年嘅《純熟意外》,佢終於唔使再飾演新人角色,將把聲壓低去演繹角色,觀眾對佢嘅表現先有少少改觀。去到前年《踩過界》,蔡思貝飾演哨牙又粗魯嘅黑社會師爺趙正妹(癲姐),形象深入民心,獲得觀眾唔少好評,更憑角色奪得《萬千星輝頒獎典禮》嘅「我最喜愛電視女角色」獎項。喺上年嘅《大帥哥》,蔡思貝蛻變成為冷靜又細心嘅革命黨成員兼大帥哥嘅妻子章沅婉,睇得出佢喺演技、聲線同埋講對白嘅速度都落咗唔少苦功,成功洗底。

image
image
image
image
image
image

傳「高潮女」Seasun成功翻兜趙世曾 收豪宅做生日禮物

當年參加無綫實況節目《有樓萬事足》,憑住金句「有樓有高潮」同「 「冇樓唔好白撞!」」而震驚全港市民嘅鄧湤鉮( Seasun),17年已經成功為自己帶來「高潮」,以600萬買入筲箕灣300呎低層單位。不過得一次「高潮」又點滿足到Seasun啊!剛剛慶祝24歲生日除咗有82歲富商趙世曾陪佢食飯之外,佢仲自爆將會收對方送贈層樓做生日禮物。Seasun話:「趙生會送禮物嘅,佢叫我去杭州自己睇樓,揀吓,我下個月去揀。」雖然層樓係杭州,不過相信佢「高潮」都唔會減弱。

image

雖然Seasun同富豪趙世曾年紀相差57年,但佢哋嘅關係絕對冇俾年紀界限影響,佢仲曾經被安排入住過「趙苑」。雖然有指係Seasun當時無家可歸,趙生收留佢。不過Seasun就話係因為工作關係,要幫趙生接待嘉賓,先會入住趙苑。但後來又爆出Seasun帶男人返趙苑,激到趙生趕佢走。二人好似冷靜咗一排,近排又成功「翻兜」啦!

與林作爆出同居疑雲 裕美短片洩露戀情?

image

現年30歲嘅裕美向來桃花不斷,2016年仲係人妻嘅時候,被指與無綫上位小生黃子恆暗交,最終離婚收場。回復單身嘅佢,上年結識咗有米外籍男友Alex,佢哋仲不時喺社交網站大晒恩愛,可惜上年年尾都係分手收場。喺今年1月,裕美被爆出秘撻麥明詩舊愛林作同遊北海道,不過佢哋未有承認戀情。近日佢哋嘅感情好似有進一步發展,裕美被指成功進駐林作嘅書房,令人聯想佢哋同居疑雲。

image
image

喺前日,裕美喺IG上載短片,片中裕美示範用日文拼音講韓文,睇落條片好似無咩特別,不過當中已經不自不覺咁洩露咗佢拍片嘅地點疑似與林作關係啦!片中裕美身處嘅書房,入面嘅白色書架、坐緊嘅黑色皮椅、白色牆壁、隔離嘅啡色椅背同埋窗口,都同林作嘅書房佈置一樣。唔知裕美淨係喺林作屋企拍片,定係已經悄悄地展開同居生活?

image
image
image
image

【謎底揭盅?】黃心穎與商台DJ結伴返歸 唔係森美原來係佢…?

「安心偷食」震撼全香港,事件已經發生咗一個星期,男女主角許志安同黃心穎已經開記招及IG出聲明道歉,而男女主角另一半鄭秀文及馬國明亦已經表態,件事好似已經慢慢平息。點知近日又爆出有個經常畫眼線嘅男組合結他手同埋某商台DJ上心穎屋企表現親暱。一向出名係「愛妻號」,而又同心穎合作過嘅森美成為嫌疑人之一,恨恨地中了一槍!之前同黃心穎一齊拍《學是學非》嘅森美,為阻止傳聞繼續發酵,唯有馬上出嚟澄清。做個負責任嘅男人,就算咩事都要令自己個女人安心,直頭要俾個like佢。

image
image
image

而事件發展到而家,茅頭又指呢個「上心穎屋企嘅人」係同森美一齊開咪,主持「公子會」嘅劉翁Sunny Lau。 一直同廣告客戶及一班電影人例如彭浩翔、鄒凱光等人都老友鬼鬼嘅Sunny,曾同心穎都有唔少接觸,二人除咗廣告方面有合作過之外,早年心穎擔任過電台節目《公子會》嘉賓!

image

黃淑儀過檔ViuTV 與ERROR成員拍飲食節目

image

無綫「御用媽咪」黃淑儀(Gigi姐),過往喺無綫拍攝過唔少飲食節目,好似有《吾湯吾水》及《吾淑吾食》系列等等。對烹飪有一手嘅Gigi姐,除咗教觀眾煮家庭小菜及煲靚湯之外,佢仲去到世界國地發掘當地新鮮食材及感受地道嘅飲食文化。不過可惜喺今年1月初,Gigi姐約滿無綫,以每個節目嘅形式去合作,咁樣佢就可以享受生活同埋有擁有更大嘅自由度。Gigi姐離巢後,咁觀眾咪冇得再欣賞到佢嘅飲食節目囉?錯啦!Gigi姐最近已經有新搞作,不過今次唔係同無綫,而係同ViuTV。

回復自由身嘅Gigi姐,早前已經開始拍攝ViuTV嘅節目,仲同ERROR嘅成員肥仔同保錡合作,齊齊去咗台灣拍攝一輯全新嘅飲食節目,主要係同台灣嘅民宿交流烹飪心得。雖然未有節目名,不過消息傳出後,唔少網民都話好期待佢哋嘅合作,認為佢哋之間會好有火花同娛樂性。

image
image

另外,Gigi姐話今次同ViuTV合作係由舊同事促成,當無綫高層余詠珊搵佢嘅時候,Gigi姐就已經同ViuTV傾好拍烹飪節目。至於,早前曾經講過有意同無綫開拍嘅《吾淑吾食-多倫多篇》,Gigi姐就話余詠珊話唔緊要,可以繼續做,不過去到臨出發就收到監製電話,指為免珊姐難做或者尷尬,所以將《吾淑吾食-多倫多篇》押後或擱置。

【「安心偷食」影響】 傳《法證IV》重拍嬲到爆粗 黃浩然靠老婆出招氹返

image

「安心偷食」已經曝光咗一個星期,事件中嘅男女主角許志安(安仔)及黃心穎事業大受打擊致形象插水,安仔喺記招宣佈暫停手頭上所有工作,而黃心穎就一直潛水,只係喺社交網站道歉。

image

其實事件影響佢哋同佢哋嘅另一半之外,被牽涉及影響嘅人實在太多,好似處境劇《愛·回家之開心速遞》由黃心穎所唱嘅主題曲已經改為純音樂、由張振朗及龔嘉欣主演嘅劇集《堅離地愛堅離地》,原本將接檔《鐵探》播出,不過因為黃心穎有份演出嘅關係,無綫已經決定抽起,改播《婚姻合伙人》。無綫高層樂易玲(樂小姐)喺受訪時指黃心穎好多代言同廣告已經抽起及取消。

另外,重頭劇《法證先鋒IV》同樣受到牽連,劇集原本計劃喺台慶期間播出,而無綫喺而家嘅深夜時段已經播緊《法證先鋒》系列,似係為《法證先鋒IV》鋪路,不過因為「安心偷食」搞到劇集要搵人頂替角色,引致劇集延播。劇中同心穎有感情線嘅黃浩然無辜咁被受牽連,咁辛苦同努力拍完一套劇集,突然話要重拍,真係咪話唔嬲呀!

image

喺日前,有傳媒發現佢一個人出街,仲要全身穿著黑色,真係同佢個「黑面」好夾,唔使問都知佢應該受事件影響,辛苦拍完套劇又無檔期播出,難怪心情差到爆。

不過好彩有屋企人嘅支持,令到浩然可以笑笑口去迎接突然其來嘅挑戰。黃浩然罕有地喺社交網站PO出一張同老婆去咗旅行嘅泳照,見佢同老婆一齊放相放閃,所以幾時都話屋企人最緊要!

image
image
image
image

「安心偷食」受害人鄭秀文開腔 出PO原諒老公許志安

「安心偷食」爆出兩日,男主角許志安喺即日晚上7時開記者招待會。到噚日,女主角黃心穎終於喺自己社交網站公開道歉。而無辜受害嘅馬國明,都同日已經接受記者訪問表示自己已經冇再嬲並仍然維護心穎。

另一受傷害得最深就係男主角許志安嘅太太鄭秀文(Sammi)。據傳佢一知道事件後一直默不作聲,更指佢不吃丶不休丶不眠又不見天日。Sammi嘅情況實在叫人擔心。但事件發生至今日,Sammi終於喺大約下午4點半於自己個人社交網站就事件發生後首度回應。

相中所見,Sammi發佈一張照片並所引用聖經經文英文版,(譯:哥林多前書13章7節:「凡事包容,凡事相信,凡事盼望,凡事忍耐。」)更用文字引述;

「這次 ,是我們婚姻中共同重要的一課。這段期間, 我們共同經歷情緒起伏, 我們也就事件詳談很久很深 . 這是夫妻二人之間的一課, 也是往後婚姻路上學習到的一課. 我們在婚姻中走進更深處, 婚姻當中除了彼此給予的幸福溫暖, 當中也深深包含了彼此的錯誤和彼此的原諒.人誰無過是老生常談,但事實確是如此啊。在這次中, 重要的, 是更進一步身歷婚姻其中真諦. 幸福不只是一埸埸順利美滿,當中也有試煉, 也一起去經歷高低狀況,讓夫妻之間的感情厚度帶領著前行, 更要彼此走進對方的內心, 一起正視各自的軟弱, 不放棄自己, 不放棄對方,互相糾正, 互相提點, 在婚姻歴煉中, 我深信經歷和教訓一定會幫助重回正軌, 生命更會更生. 這期間在我們彼此都最難捱的時刻, 握著手一起祈禱, 對我們的幫助極大. 今天, 肩上的重擔彷彿輕了很多. 只願一切快平息, 回歸平靜. 最後摯誠請求各大傳媒不要再等候和追訪我年紀老邁行動不便的父母. 沒有更多想表達了,今天以後,就只向前看, 在時間的見證中,繼續一步步前行.。」

可以睇得出Sammi已經表明立場選擇原諒安仔,佢覺得每個人都會做錯事,今次嘅錯事只係上咗一個婚姻寶貴嘅一課,縱使難捱,但佢仍然相信雨過後有彩虹!而Sammi亦因為一直有信仰嘅關係,所以佢希望安仔可以透過經歷及教訓去幫助重回正軌,更表示今次「安心偷食」令佢對呢一段婚姻仍然充滿希望!