港女講日:做人男友甚艱難! 理想男友5個貼地特質

日本情侶首飾品牌THE KISS每年聖誕節前夕,都會做個關於「理想情人」嘅慣例調查,以全國20-29歲未婚男女為對象,票選出「最符合理想男友.女友嘅藝人」,結果今年男女組冠軍得主就係剛於日劇飾演情侶嘅「大叔」田中圭同埋「國民老婆」結衣BB。

男網友票選之「理想女友」第一位有冧莊嘅新垣結衣,第2至5位順序係有村架純、廣瀨鈴、本田翼同埋綾瀨遙,賽果唔意外,全部都係宅男女神;女網友票選出「理想男友」第一位係首度入榜嘅田中圭,第2至5位順序有竹內涼真、吉澤亮、松坂桃李及山崎賢人,入行18年嘅田中圭今年憑大熱劇《大叔的愛》成功走紅,人氣大爆發,日劇影響力果然強勁!

人紅是非多,有指田中圭超級爛賭,而且偷食有前科,係唔係理想男友見仁見智。究竟女士眼中,理想男友要具備咩條件呢?唔係要好似韓劇入面咁不合邏輯嘅完美oppa,以下幾點相信男友們都唔難做到。

1. 坦誠相對

兩人相處在乎,女生心思細密得,如果男生咩事收收埋埋,女生會感到好不安,調返轉男生都唔希望女生有事隱瞞,有話直說先係最開心嘅相處之道。

2. 帶伴侶出席兄弟聚會

安全感問題吧,女生好自然會想識男友嘅朋友,除了令佢哋知道有「阿嫂」嘅存在,亦可以更了解男友同兄弟之間嘅話題與興趣,可以打成一片更加好,與男友關係會更緊密。

3. 互相取笑

識得講情深說話外,間中取笑一下對方,笑佢「肥嘟嘟」、「傻更更」都會令女友感到更sweet,只有親密、熟悉嘅人,先會毫不掩飾地取笑對方,係愛啊!

4. 與異性避嫌

女生對於安全感及忠誠好執,當男友與異性接觸太過頻繁,好易會引起女生猜疑,唔係要你與異性斷絕來往,但要識得避嫌,令女友安心。

5. 生病時陪在身邊

女生生病時不論身體還是精神上,都係最脆弱嘅時刻,當男友喺個時候陪在身邊照顧左右,對女生來講係非常窩心同埋感動,女友會永遠記在心中,對男友更好。

圖片來源

日劇《無法成為野獸的我們》

港女講日:唔止供超人變身! 3個循環再用電話亭方法

你上一次用電話亭傾電話係幾多年前? 隨住手機普及,公共電話變得可有可無,不過幾日前日本居然出現排公共電話人龍奇景,究竟咩事?

原來日本三大電訊商之一Softbank早幾日發生全國大規模故障,電話、互聯網服務癱瘓5個鐘,打唔到電話、上唔到網,對機不離手嘅現代人嚟講簡直係災難! 同日「SoftBank」、「通信障害」即刻上咗twitter熱門關鍵字排行榜!

一齊入榜嘅關鍵字仲有「高みの見物」,意思係使用其他電信商嘅人在隔岸觀火;另一個就係「公衆電話」,好多後生仔表示,咁大個人都係第一次打公共電話,出現好多蝦碌事好似冇散紙、冇電話卡同埋唔識點樣打等等…有網民仲話因工作關係打唔到電話太煩,只好拎住10圓周圍搵電話,「第一次覺得公共電話好神」!

為咗令呢個公共設施起死回生,世界各地唔少人絞盡腦汁幫電話亭轉型,幫呢個老古董再次服務社會,除咗避雨、供超人變身,仲有以下幾個用途:

1. up-grade功能

紅色電話亭係倫敦標誌,不過部份電話亭已塗上綠色,變成手機充電站。奧地利電話亭就被改裝成電動車充電站,由太陽能發電,為電動車、電動綿羊仔及電動單車充電。另外,好多城市包括香港,都將電話亭改裝成免費WiFi熱點,提供上網、國內免費通話、充電等多項功能。

2. 公共藝術

英國有小鎮將電話亭改造成可能係全世界最微你嘅畫廊,由一位65歲老人創立,搜集當地居民各類畫作於亭內展出。大阪有藝術家將電話亭活化成金魚缸,金魚喺日本文化中,有幸福、歡樂意思,裝置藝術旨在令途人與「金魚缸」擦身而過時獲得幸福快樂。

3. 社區服務

蘇格蘭有小鎮將電話亭變成24小時自助café及資訊中心,途人可一邊飲咖啡一邊上網,拎介紹當地景點嘅小冊子。英國有電話公司將100個電話亭改造成小商店,再以低價租畀長期失業者,幫佢哋自力更生,小店種類多元化,有糖果店、café、網吧及別具傳統特色嘅擦鞋檔口等。英國西南部亦有一批小鎮居民,在區內唯一電話亭裝上四層書架,成為迷你圖書館,各自將自己喜愛嘅好書、唱片、影碟放上書架,與鄰里分享。

圖片來源: thetv.jp

港女講日:支持環保!寄賣二手衫/清衣櫃3個好去處

唔少日本女優在FANZA賣場賣私物,當然,定價與女優等級成正比,女優等級愈高衫自然賣得愈貴,「國民AV女優」三上悠亞嘅貼身衣物更加係接近天價!

甜美外表加G級豐滿好身材,三上悠亞係唔少男性眼中性感女神,近日佢於賣場拍賣自己拍攝寫真集著過嘅衣物,最平係一件波點裙,30,200日元(約港幣$2,085)賣出、吊帶背心價格係55,100元日元(約港幣$3,805),雖然外衣只比其他女優價錢高少少,但加埋原味內衣等貼身衣物就唔燧咁講法,價格倍翻!其中一件粉色胸圍配短身上衣加襪嘅拍賣價,叫到100萬日幣(約港幣7萬),破哂紀錄,三上悠亞魅力果然驚人!

Shopping買衫係女士天性,轉季清衣櫃時通常會發現所謂舊衣物,或者只係著過一兩次,甚至連標籤都未剪,扔掉又覺得可惜,不如學三上寄賣二手衫又或者捐出去舊衣回收店,為二手衫搵個新主人,支持環保!

1. Green Ladies

聖雅各福群會於2008年成立嘅Green Ladies,係全港首間以寄賣模式營運嘅二手社企,寄賣者要親身將衣物送到分店,店員即場按款式、可重用程度進行篩選,物主需填寫寄賣合約,最多可選三七分帳,亦可選擇全數捐贈。不過,有興趣寄賣者要留意條款,例如行政套裝、內衣褲、睡衣、襪或襪褲等都唔收,鞋亦需要9成新先會回收,二手衣物由Green Ladies訂價,若寄賣貨品兩個月未能售出,將自動歸Green Ladies Shop所有,寄賣者唔可以取回。

2. 時尚品牌之自家回收箱

Fast Fashion品牌如Uniqlo、H&M及MONKI分店設舊衣回收箱,Uniqlo與聯合國難民署(UNHCR)合作,向全球難民提供服裝援助,只要乾淨冇爛,都可以將Uniqlo衣服交回店鋪進行回收。H&M及MONKI則接受所有品牌經清潔後嘅服裝,每捐一袋更可獲得購物折扣卷。

3. 社區回收箱計劃

民政事務總署早年推出「社區舊衣回收箱計劃」,委任香港地球之友、基督教勵行會、救世軍及長春社,在屋邨及屋苑設置回收箱,歡迎市民將質素較好之衣物用袋包好後放入回收箱,但內衣、爛衫及有異味嘅衣物除外。市民亦可以將鞋、玩具、文具及書籍放入回收箱,達到循環再用原則。

圖片來源: [email protected]_mikami

港女講日:有拖拍一定心廣體胖?4招擺脫「幸福肥」

「女性向AV」有別一般以男性觀眾為主嘅AV,因為係拍畀女生睇,比較著重情節及畫面,亦出現一批顏值與下體都要咁「強勁」嘅AV男優。早前日本有節目進行街訪時,就遇見一位自稱男優嘅路人,令人印象好難忘呀!

日本節目「月曜から夜ふかし」早前於澀谷街訪兩名男生,街訪主題唔重要,因為主角係受訪者身份!按照慣例先簡單訪問受訪者背景,企右邊嘅攣毛男表示自己係曾上過該呢個節目嘅女性向AV男優ムータン,但觀眾記憶中嘅ムータン明明係被日本網民稱為AV綾野剛嘅鹽臉男。

鹽顏特質係細眼、皮膚白、帶點神秘感嘅安靜男生。但節目中嘅ムータン,面型圓潤似發脹麵包,簡直係男神崩壞!佢發幅有原因,原來佢父母欠債2,000萬日圓而失蹤,因為要償還巨額而壓力大到肥咗30公斤!唔怪得女性向AV網站冇再見到佢嘅新作啦,不過ムータン冇因為身型走樣而放棄做AV男優,反而繼續密密拍,終於還清所有債務,好勵志!

發福原因唔只得欠債壓力,熱戀中嘅情侶情況仲嚴重!想擺脫幸福肥,即學以下4個tips:

1. 唔好空肚去拍拖

有冇試過肚餓行超市,會失控狂買零食?所以陪另一半約會或應酬前,要食啲嘢打底,因空肚好容會「選擇錯誤」,破壞健康嘅飲食大計。

2. 在家約會煮飯

比起外出用餐,不如多啲在家約會兼煮飯仔,將卡路里及熱量吸收大大減少,如果另一半飲食習慣唔太健康,就趁在家煮飯時設計好味又低卡嘅餸菜,趁機為對方建立健康均衡飲食習慣,兩個人一齊維持好身材。

3. 搵出共同運動喜好

與其兩人hea在家睇電視食零食,不如一齊規劃活動,例如相約另一對情侶一齊打羽毛球、行山等,約會同時可以消耗卡路里!此外,不妨送對方一隻健身手帶,鼓勵每日做運動。

4. 拍拖唔係得飲飲食食

好多人約會除咗一齊出去食飯就別無選擇,其實仲有好多事可以做,好似幫對方按摩、一齊學新知識等,令身心放鬆放齊齊增值自己,仲可以增進彼此感情,更重要係唔駛透過「食」去消磨時間。

圖片來源:月曜から夜ふかし

港女講日:世紀難題…4絕招教你避嫌又可以與異性朋友有friend做

未結婚前,可以大條道理與異性朋友玩到癲,傾天光盡訴心中情都冇咩大不了。但有朝一日結咗婚,變成人夫/人妻身份,應否與異性朋友保持距離,大家就有唔同睇法。有人覺得為免瓜田李下,最好避忌啲與異性保持距離,但亦有人覺得唔駛避嫌,只要尊重伴侶,對方許可就可以同異性朋友食飯。

今年7月與桐谷美玲結婚嘅三浦翔平,就屬於後者,早前佢喺電台節目《三浦翔平 It’s 翔 time》發表呢方面嘅意見,當9成聽眾認為伴侶同異性朋友獨處有問題時,三浦就覺得只要事先知會太太就OK,好似佢最近就去咗捧老友大原櫻子場去睇舞台劇,之後仲一齊食飯咁,佢會預早同桐谷交待飯局詳情包括時間、地點、邊個會出席等,得到桐谷許可三浦先會赴會。

想同異性保持距離又唔傷害夫婦感情,首先你要令對方安心又放心,即學以下4招:

1.拒絕過份親密

你哋兩個係超好朋友,你知異性朋友知但你另一半未必知!過份親密嘅行為及身體接觸,少不免會惹人誤會及閒言閒語。人言可畏,避忌啲就可以避免不必要嘅麻煩。

2.update感情狀況

或者你哋識於微時,初相識時大家仲係單身,但有另一半後,一定要同對方講得清清楚楚,唔好抱住收兵心態大玩暖昧,其實同一腳踏兩船無分別!

3.識得Say NO

有時可能你想做好人,唔想hurt到對方,所以唔想拒絕對方要求。但就係因為你好心,令對方誤以為兩人有機會發展,你當佢係好朋友,佢就投入全副感情,最後只會兩敗俱傷。

4.避開暖昧話題

你自知同對方只限朋友,但對方可能唔係咁諗,如果你成日同佢講啲暖昧說話,而對方又真係暗戀你嘅話,你以為只係無傷大雅傾閒計,好有可能變成「美麗」誤會。

圖片來源:日劇《有喜歡的人》

港女講日:日本唯美彩妝廣告 以女同志為主題獲網民大讚

對於同性戀呢個議題,一直都係大眾熱門討論嘅焦點,早前日本資生堂於萬聖節發佈彩妝微電影廣告《The Party Bus 好きだなんて 言えない》(派對巴士 欲言又止…好喜歡你),就以LGBT(同性戀、雙性戀或跨性別族群)為題材成功引起話題,加上唯美色調及瑰麗畫面,榮獲「EPICA AWARDS」國際優秀廣告獎金獎。

故事圍繞3位主角,女主角「輝夜姬」、戀人「德古拉公爵」及神秘「蒙面武士」。萬聖節當晚輝夜姬、德古拉公爵同眾好朋友出席於巴士上舉行嘅cosplay party,不過輝夜姬成晚心不在焉,明明情人就喺身邊,心入面就諗住第二個。原來佢最近發覺自己最好嘅朋友對自己似乎超越咗友誼,但兩人都怕會影響大家關係而唔敢再進一步。

當德古拉公爵怖到濃時想錫輝夜姬,佢不自覺地留眼淚,面上妝容亦發生奇妙變化!嘴唇上嘅紅色唇膏好似施咗魔法咁,化作一位紅色女孩,手舞足蹈,彩色眼影亦加入一齊輕快跳舞,象徵輝夜姬內心最渴望嘅勇氣及自由!

輝夜姬睜開雙眼,避開德古拉公爵一吻,然後衝落巴士,追上剛離開嘅「蒙面武士」,武士除低面具,原來佢就係輝夜姬最好嘅朋友,輝夜姬眼神堅定,兩人情深一吻。影片最後寫住「Make up your own story」,表達女生因為彩妝而獲得勇氣,勇敢追求真愛!

Love has no gender!廣告以LGBTQ(對其性別認同感到疑惑嘅人)話題作為結局,為觀眾帶來小驚喜,而且令人深思。當然,廣告另一加分位,就係出現咗只有短短分零鐘嘅「定格動畫」,原來耗時幾十小時拍攝,唯美色彩、華麗畫面,令人眼前一亮。

圖片來源: 資生堂

港女講日:除咗識煮飯…男人拍拖時仲想女友做到以下幾件事

雖然好多男人表面唔介意女生係地獄廚神,但事實上,任何人都想食好西多過暗黑料理吧,男人總會幻想娶到一位賢內助,入得廚房出得廳堂!

最近日本網絡媒體Yummy訪問日本男生最想女朋友為佢哋整咩料理,頭3位如下:

第1位 咖喱

可以講係日本人國民級料理,因為由細食到大,對男人來講有一種回憶味道。咖喱易煮唔駛好高技術,不過唔擅長煮食嘅女人亦唔可以掉以輕心,因為日本人都係咖喱專家,味道稍有差池都好易食得出。

第2位 玉子燒

係媽媽嘅家常料理,所以男人一食玉子燒就會諗起阿媽,覺得好warm。

第3位 漢堡扒

比起咖喱、玉子燒,整漢堡扒需要較多時間同埋功夫,男人知你肯花心機整畀佢食,會覺得充滿愛。

男人最想女朋友為人佢做嘅事,又點只煮出一手好菜呢一樣,以下呢啲如果都做得到,你可以話係近乎完美!

1. 睇時機說話

女人識得睇時機好重要,當男人打機、睇波同朋友吹水時,千祈唔好搵佢討論任何事,佢一定聽唔入耳,你只會激死自己!

2. 唔好逼佢參加姊妹聚會

大部份男生對於女人聚會其實都冇興趣,好似出嚟就係要畀你班閏蜜評頭品足,好難頂,始終多留一點獨處空間畀對方喘息,先係交往生存之道。

3. 參與並了解對方興趣

試吓陪佢做佢覺得有興趣嘅事,有咩比一個女朋友可以一齊坐低睇波或主動陪佢打機更好?

4. 控制脾氣

切忌公主病上身,控制自己脾氣,態度圓滑啲,對大家相處都好。不過我認為女生M到時就可以任性少少啦,都係一個月一兩次啫!

圖片來源: www.pakutaso.com

港女講日:一生人只要有30個好朋友就夠!

朋友唔需要多,有一個真心嘅就夠?自稱讀心師嘅日本Youtuber兼作家Mentalist DaiGo(メンタリストDaiGo),今年9月出版一本名為「人間関係をリセットして自由になる心理学」嘅書,建議人類應該學識斬斷多餘嘅人際關係,朋友數量唔係求多咁話,咁佢嘅標準係有幾多個?

答案係30個!DaiGo認為友誼都要「斷捨離」,留低30個「益友」就夠,然後集中加深與呢30位朋友嘅關係,藉此促進事業發展、身心健康,令生活過得更加充實!

本身係一個好好嘅觀點,但最近在2ch討論區就被網友質疑好難實踐,因為「根本連30人都冇」、「冇朋友所以唔駛斷捨離」等等,咁網友覺得朋友應該要有幾個呢?有人認為3個就夠,有人就話10-15人左右好啲,亦有好多人考慮到婚禮及葬禮問題:「朋友連30人都冇點搞婚禮?」、「我個喪禮現場應該得火葬場員工吧,到時爸媽都唔喺度了」…

所謂「人生得一知己,死而無憾」,各位又有幾多位益友呢?能夠遇到好朋友好知己真係唔係咁易,如果你同老死有齊以下特徵,要好好珍惜!

1 唔會講假話

講真話有時會令對方難受,但真正嘅好朋友都唔會選擇向你講大話、對你阿諛奉承,而會將佢真實感覺講出嚟,真正朋友唔會因為因為呢啲小事而破壞感情。

2 放心講秘密

講秘密真係要好小心,唔覺意講咗畀個口多又口疏嘅人知,到時出醜係自己!不過對住真朋友,你可以好放心將秘密講佢知,因為佢一定唔會出賣你。

3 有共同討厭嘅人

好朋友就係你最好嘅戰友、後盾,永遠同一條船。當你討厭一個人,佢都會同你一齊討厭嗰個人,然後一齊講佢壞話!

4 陪你笑喊

一齊經歷歡樂、悲傷。你畀人飛、佢比人恰,大家耐心聽對方吐苦水,見佢喊你甚至比佢仲傷心,喊埋一份;一個眼神、一個暗號又可以笑到趴街。

5 對你瞭若指掌

相處耐咗,你哋知道對方鍾意咩style嘅衫、鍾意咩特徵嘅對象;唔鍾意食啲咩、唔鍾意做啲乜。

圖片來源:www.pakutaso.com

港女講日:何必逼自己拍拖?一個人生活都有好多優點!

日本一項針對全國大中學生約1.3萬人嘅最新調查發現,有約會經驗嘅男女生比例都創40年新低,令社會擔心年輕人越來越「草食化」!

根據日本性教育協會今年8月發布做嘅調查,報告詳盡列出國中、高中、大學嘅男女生在約會、接吻、性交經驗嘅比例,發現日本大學生約會經驗比例係自1974年做統計以嚟做低嘅,顯示曾有性經驗嘅人數減少,年輕人對性態度越來越消極!

不過一群年輕網友就唔係咁睇,話就話係40年新低,但其實男生有超過7成(71.8%)、女生有接近7成(69.3%)嘅約會經驗,其實比例都唔算低啦,咁都叫「草食」?

有人認為「7成咁高令人驚訝」、「我係屬於3成嗰邊」…亦有網友表示唔駛因為約會率高就有壓力,冇必要迫自己約會!呢句啱聽喎,冇人約又如何?一個人又如何?單身比你想像中多好多好多好處!

1.思緒更加清晰

男女關係非常耗費精神,往往令人分心,導致好多時都會有負面影響。拍拖時,總會擔心自己另一半,甚至避免各種任何會造成對方唔開心嘅行為,唔想引起爭拗,壓力好大,反而單身會令你頭腦更清晰。

2.更能獨立思考

陷入一段關係,好易會迷失自我,因為戀愛時冇時間專注個人發展;當獨自一人時,單身會為你創造更多獨處時間,令你聆聽自己內心聲音,追尋自己目標。

3.帶來更多儲蓄

唔係講笑,有幾多個拍拖每個月唔會用突咗?單身唔駛買禮物、唔駛請埋另一半食飯,經濟各方面都較為鬆動自在。

4.更關心身邊人與事

一段戀情當然可以好精采,可以有個人分享生活中的起起伏伏,但好易忽略其他領域,例如熱戀時有異性冇人性,同老友感情或者疏遠咗;將時間用來見另一半,唔記得仲有屋企人都好關心你,仲有健康問題、興趣等等,都有可能因為戀愛而疏忽或冷落。

圖片來源:mens-modern.jp

港女講日:網上掀媽媽道歉潮 日研指子女「學力」遺傳母親「學歷」

今次真係媽媽躺著也中槍!日本MBS電視台冷知識節目「林先生が驚く初耳学!」,最近講及父母對子女成績嘅影響力,發現「媽媽學歷決定子女成績」,搞到唔少媽媽網友紛紛於網上向子女道歉!

節目引述日本文部科學省(教育部)一項「父母係高中或大學畢業,與子女在國3數學考試正確率的嘅關係」嘅調查,發現爸爸學歷影響子女考試正確率嘅差距係12.4%,而媽媽就係16.7%。

從呢項數據可以見到媽媽學歷比起爸爸,對子女成績影響係大啲,不過差距又唔算好誇張,點知節目即刻列出一篇美國研究報告,斬釘截鐵咁話「頭腦醒唔醒,係母親遺傳」!

報告指出父母分別遺傳畀子女唔同嘅大腦部位,爸爸主要遺傳「管理情緒、本能」方面,媽媽主要遺傳「記憶、思考、認識等部份,所以子女成績唔好,怪阿媽又有啲道理喎!

當然研究還研究,唔一定啱哂啦,可憐係一眾媽媽睇完節目後,紛紛於網上向子女道歉:

「阿仔,我對你唔住…」

「對唔住,都怪我蠢,遺傳到畀你喇…」

「頭腦好唔好只會遺傳自媽媽!有我呢種媽媽真係抱歉!」

只能講句,做人阿媽甚艱難!生之前諗清諗楚呀,第日啲仔女成績差走來怨你蠢,你唔慌唔頭痕呀。

圖片來源:http://news.livedoor.com