港女講日:小心踩地雷!日本網咖店員力數西客之缺德行為

西客度度有,有日本網友於twitter分享於漫画喫茶(即網咖,可上網睇漫畫同埋沖涼過夜)打工嘅嘔血經歷,睇完相信你寧願住晚酒店,都唔會慳錢去網咖過夜!

曾於網咖打工長達3年嘅網友Kima(@kima1221)離職半年後,將當時遇過嘅各種西客變成漫畫,於twitter上分享,近萬人like、多達9千多人share!

雖然Kima打工嗰間網咖用上黑色裝潢、座位寬敞,好似好高格調咁,但遇到嘅客人水準就超低!以下3種西客驚嚇行為就令佢非常深刻!

1.走數

因為客人離場前先要埋單,所以成日都有冇帶但又已享用服務嘅西客。Kima話曾經有位女客人冇錢找數又冇帶證件,唯有報警,最後客人抵押手機再返屋企拎錢,結果竟然過咗約定日期半年後先返嚟找數,但佢完全冇表現出唔好意思、反省嘅樣。

2.周圍痾

話說某員工於其中一個包廂發現便便,徹底打掃後,間房仲禁用咗一排,但周圍大便嘅西客陰魂不散,連走廊都有!大便之外,亦有客人試過留低一攤尿漬,甚至下身赤裸坐喺櫈上瀨尿都有!!!

3.性交

身為一個大人,唔可以喺公共場合發生性行為係常識吧!Kima話外表越普通,越有可能在店內搞!店家除咗會收取應收嘅費用,亦會登記客人證件,以後不得再入店消費。但某對因發生性行為而被驅趕嘅情侶以「只使用30分鐘」為由,拒絕畀3小時包箱費,仲反控店家冇事先告知唔可以在店內性交!

唔少網民睇完呢幾個西客缺德實錄,表示超有同感:「我撞過客人在逃生梯痾屎、因為打輸麻就打爛牆壁、或者將件沾有血跡嘅毛衣丟落垃圾桶」、「我之前喺K房打工,情侶客人離開後通常都會掃到用過嘅保險套,或者係女生將保險套丟入女廁垃圾桶之類」。

圖片來源:enjoytokyo.jp

港女講日:細袋與異性緣成正比…用細袋仲有咩好處?

近年時裝界興用mini bag,各大品牌手袋越出越細,日本妹亦唔例外,非常鍾意用微型手袋,不過就唔係為咗跟潮流,咁究竟係咩原因呢?

日本電視節目《ZIP!》早前播放關於「女性只用細袋」嘅特集,有一班後生女為咗拎細袋出街,寧願唔帶銀包,直接將cash放入袋;唔帶化妝品,是旦走入化妝店扮試用;因手機放唔入袋而長期拎住,結果成日跌爆mon…雖然咁麻煩,但佢哋都堅持用細袋,原來日本年輕人有個古怪觀念:「好女人先會拎細袋!」

節目訪問咗唔少男女生,發覺大家都認為用細袋嘅女生,畀人有一種擅於整理、收納嘅感覺,令人覺得更有魅力!相反,部鈔受訪者覺得用大袋嘅女生比較混亂、污糟,唔識得收納呢個美德。更加有受訪者表示唔靚嘅女仔先要用大袋:「靚女想要咩問人攞就得啦,駛乜自己帶!」

喺日本人眼中,手袋size大細,就係反映有冇異性緣嘅關鍵吧。雖然個人認為冇需要為咗迎合旁人看法而專登改用細袋,不過其實拎細袋都有好多好處!

1.拉長比例

亞洲人身材偏嬌小,用細袋可以拉長身體比例,顯高顯瘦!

2.訓練收納

有研究指,平日帶出街嘅嘢幾乎80%都唔會用得著,用細袋咪可以限制自己帶少啲嘢出街,未嚐唔係一件好事嚟!

3.倍添潮味

手袋細自然比較輕,就算冇handle位都可以好易拎上手,除咗側揹之外,可以好型咁當clutch拎住又得,出街又多一個style!

圖片來源:[email protected]