你有無?其他人永遠不會明白的十大無謂堅持

日本人同香港人一樣,生活喺一個高壓社會,怨氣多,好易會對某啲人或事物唔順超。最近日本Twitter有個非常受歡迎又好得意嘅話題:「別人難以理解自己討厭的東西」(#他人に理解されにくい自分の嫌いなもの),網友們相繼po出唔同嘅「睇唔過眼事物」,估唔到引起好多人共鳴,以下10件事,驟眼睇好小事,但原來好多人會睇唔過眼!

1.食飯食淨幾粒喺碗

有幾多人自細老豆老母就要你哋趴到隻碗一粒飯都唔可以淨低?因為「唔食乾淨碗入面啲飯會娶豆皮婆/嫁豆皮佬架!」

2.飲咖啡時滴咗滴喺杯出面

好礙眼呀,唔該舔咗去好嗎?

3.窗簾唔拉埋留條罅

應該係細個睇看鬼片有陰影,唔拉埋真係好唔舒服!

4.唔將商品放回原位

強迫症患者見到會發癲,好想將佢物歸原位!

5.番茄核嘅味道

有人覺得酸酸哋,味道好特别,但亦有人忍受唔到,我就唔知喇我係連番茄都睇唔過眼!

6.食完煙將煙灰彈出車外

勁憎!呢個唔難理解呀!仲有逼人食二手煙嘅人都係一樣咁乞人憎!

7.啤酒

飲邊隻都係咁苦,有咩好飲呀?

8.單車逆線踩

呢樣喺香港好常見,好多人踩單車都冇遵守交通規則!

9.摺到廁紙咁樣樣

其實呢個行為好貼心,但你用「辦完大事」隻手來摺,未免…

10.黑色口罩

近來好多人出街都戴黑色口罩,造型多過實際用途,不過我覺我幾型呀,好想買返個!

唔知大家又有冇同感呢?

圖片來源:twitter #他人に理解されにくい自分の嫌いなもの

日本低頭族爆笑奇遇 買衫排咗喺假人後面

今時今日人人機不離手,唔理行街定搭車都係低住頭,因為狂碌電話分心而發生意外亦經常發生。近日有位網友於Twitter分享一個關於在UNIQLO機不離手嘅「小意外」,居然引發瘋傳!

網友もちぎ(@omoti194)發文:「在UNIQLO一邊碌手機一邊排隊結帳,結果唔小心排到假人後面,陷入永遠畀唔到錢嘅無間地獄。連店員都笑了」

唔少網友表示網主瘀得嚟又幾可愛,仲惹來唔少網友留言:

「我有見過同假人道歉『啊,唔好意思』嘅人(笑)」(@fnfIGInf0MJeiST)

「細個同屋企人去不二家,爸爸曾經將妹妹同牛奶妹公仔搞錯,拖住牛奶妹隻講『買完蛋糕返屋企喇』,當下覺得老爸累了」(@sigulemon)

Twitter入面仲搵到好多人有相關嘅UNIQLO「排隊經驗」:

「裡面冇咩人客,我排隊時唔小心排喺假人後面」(@raimon49)

「一邊碌手機一邊排隊結帳,發現排我前面嘅人係假人,搞到我仲想鬧前面條隊點解冇郁過」(@zack_fair0903)

「原本見到櫃台前面排住一家人,想催姐姐趕快去排隊結帳,細心一睇先發現竟然係一排假人…」(@spring_917)

估唔到唔小心排喺假人後面嘅人有咁多,睇嚟日本UNIQLO要換換公仔模特兒嘅位置喇!不過真正講到要檢討,其實應該係對周圍情況不聞不問嘅低頭族吧,有咩理由咁都會排錯架!

圖片來源: @spring_917、[email protected]

滑雪原來咁危險?新手5大常見問題

日本除咗多嘢食多嘢玩,仲係滑雪好地方,呢排FB都成日畀朋友嘅滑雪相洗哂版!不過滑雪始終係一種高危活動,最近就有一位日本網友分享喺滑雪場嘅慘痛經歷!

網友ピロティ喺twitter發文近日於滑雪場樂極生悲事件:「我最想講就係滑雪板條繩一定要綁好,我隻手指被無人看管嘅滑雪板以時速100公里撞埋嚟切斷咗,如果撞到頭或腰就死咗喇!」

滑雪板就算唔重,但由斜坡衝落嚟,殺傷力係好可怕架!事主表示手套冇事但手指就斷喺手套入面,左手食指中間以上斷開咗,超恐怖!好彩場內急救隊員趕來救援,即刻將斷指送去醫院縫合,復原亦算順利,加上滑雪板主人亦配合賠償,事件總算告一段落,但事主再次強調,提醒各位玩snowbroad時一定要將腳繩綁喺小腿位置,唔好畀滑雪板離身,傷及無辜!

見人玩得咁開心,自己都心郁郁想去滑返轉?不如先睇下以下幾條初心者常問嘅5大問題再考慮係咪去馬啦!

1.跟團/自由行

既然係新手,就唔好浪費精力喺瑣碎事務上。跟團,只要避開紅假時段,一般團費都好合理,特別係專營滑雪團,通常包食宿、Ski Pass,代租器材及安排課程等,仲有專車接送,乾手淨腳。唔想一次玩咁多日,亦可報一日local tour試下水溫先。

2.Ski/Snowboard

港人特別係後生一代都偏好玩snowboard,貪佢夠型,但其實好睇個人喜好,Ski易學難精,唔會成日跌,但對Ski Boots較難適應;Snowboard難學易精,適合唔怕跌、輸人唔輸陣、鍾意扮勁嘅人。

3.教練/自學

新手為慳錢可能就咁跟朋友學,你有可能因朋友唔識教而學極唔識,以為自己資質問題而放棄,又或者你符符碌碌滑下滑下就滑到,但其實方法錯哂,想征服進階滑度先發覺力有不逮。而且我再強調一次,滑雪係高危運動,都係跟持牌教練慢慢學基本動作同埋安全守則,有啲錢唔慳得。

4.租/買器材

滑雪屬於高消費運動,第一次實在毋須「重課」。一般大型雪場,除器材外,仲有滑雪裝束及其他防護配件可租用。另外,多啲留意滑雪群組,不時有同好放出衫褲鞋及器材。

5.禦寒物品

新手唔駛太擔心會凍親,因為你會熱到出哂汗!因為初學階段跌多過滑,「跌完再起身」呢個動作會幫你大量排汗!滑雪基本裝束包括防風防水耐磨嘅雪褸雪褲、冷帽/頭盔、護目鏡、面罩、圍巾、防水滑雪手套、透氣保暖排汗嘅打底衫褲、及膝襪、Ski Boots/Snowboard Boots,其他好似冷衫、羽絨或頸巾等都唔駛戴出滑雪場。

圖片來源:[email protected]

一睇就想unfollow! 4種最想鬧爆嘅IG Story

image

有人話「依家啲後生唔用facebook架啦…」計我話,依家啲後生連IG都唔po架啦,個個都用哂啲心機去整一個會消失嘅IG story!

不過正因IG Story得24小時,令到日本一班後生仔以為冇人會見到,做咗好多蠢事,以下幾單都係新鮮滾熱辣發生冇耐:

1.平價迴轉壽司連鎖店藏壽司兼職員工,將魚生掉入垃圾筒後再執起放砧板,搞到公司股價大跌,損失高達27億円。

2.有顧客喺連鎖咖啡廳「コメダ珈琲」將大量砂糖倒入飲品,勁浪費。

3.有客人喺迴轉壽司店「はま寿司」徒手摸眼前轉過嘅壽司。

4.燒肉店「でん」有辣妹喺燒網上倒酒不特止,仲將燒肉汁倒入口再吐喺燒網上,好嘔心!

自從Instagram推出限時動態後,好多人事無大小都放上去,好多人認為上載過分行為亦無傷大雅,以為只有朋友睇到。唔好咁傻豬啦,其他人一樣可以將影片及照片轉發,搞大件事架!可能你未必會po以上咁極端嘅行為,但都有好多網民覺得成日會見到一啲好乞人憎嘅IG Story內容,以下4種你點睇?

1.圖文不符

繼Fb、IG相片帖文後,圖文不符現象亦轉移陣地到IG Story,放一張去玩嘅相但就話「心情好差」,究竟係咩玩法?

2.無病呻吟

「#心累了」、「#好想死」等負面字眼同樣會出現喺IG Story,一開始都可能有人會擔心你,但「狼來了」幾次之後,朋友心諗「又嚟料?」,覺得你無病呻吟引人注意,唔係「全世界都欠你架」,慢慢就會無視呢種Stories。

3.整蠱

好似連續發幾十個Story,每個Story得1隻字,又或者將字放到最細,仲要喺最唔明顯嘅位置,你覺得好得意?我就覺得勁幼稚!

4.曬命

內容通常要表達「我係上等人」,影下名牌袋、揸住名車影住軚盤logo等都係入門級,目的係想令大家羨慕,話畀人知我生活得好好。

圖片來源:ニコニコニュース

夫妻唔一定係曬恩愛 懂得小情趣先係高手

得罪老婆從來唔會有好下場,當兩公婆鬧交過後,日本人妻最叻整「鬼嫁便當」報復老公,宣洩不滿。

近日,網民しょ-た(@shota21ura)因為激嬲太太,翌日便當只得白飯同埋用紫菜拼出「唔好睇小我」嘅日文,佢話老婆從未整過報復便當,所以都嚇咗一跳,好怕畀同事見到。本來以為真係得白飯,最後發現隔住錫紙底層,係超豐富嘅配菜!原來老婆只係口是心非,唔捨得餓親老公,佢當然超感動啦,放工即刻買甜品返屋企,成功氹返老婆!

其他網民超羨慕しょ-た有個溫柔老婆,娶到呢啲女人,係一輩子嘅福氣。原本以為係訴苦,點知原來係放閃先真,呢個放閃po夠哂高質,想低調地哂恩愛必學!另外仲有以下幾個日本夫妻放閃招數,亦不妨參考一下:

1.配對雪糕蓋

日本網民okaxaki到細佬屋企作客玩記憶配對遊戲,正常用啤牌玩,但細佬兩公婆就用Haagen-Dazs雪糕蓋玩,佢好奇怪點解會有咁多一對對嘅杯蓋,原來兩口子自結婚後食雪糕都會一齊吃,每次都會一次過買兩杯同口味雪糕,慢慢就儲咗成疊有各種味道嘅雪糕蓋,全部成雙成對! okaxaki將故事分享上Twitter,大批網民表示「好閃」、「好恩愛」,sweet到連日本Haagen-Dazs官方Twitter帳號都有轉發介紹。

2.蜜月航拍

日本夫婦山口千貴及太太,新婚蜜月旅行帶住航拍機,由新加坡開始,從亞洲到歐美、非洲等國家展開400日嘅蜜月旅行,環遊48個國家及地區,佢哋將旅程珍貴時刻剪輯成短片並放上Youtube分享,吸引全世界網民注意。

3.老夫老妻情侶裝

日本有對老夫妻已經踏入花甲之年,結咗婚38年,情侶裝亦著足38年,而且唔係由頭到腳著同款單品咁悶,每套衫都悉心襯過先再影相po上ig,能夠同一個人著情侶裝著到頭髮都白哂,真係好難得,亦證明放閃唔限年齡!

圖片來源:[email protected]

日本男人推介 4款外套就可以著夠一年

正所謂「Fashion嘅嘢你識條鐵咩」,今時今日fashion界經常令人無法理解,創意度滿分,可惜唔係人人敢著。估唔到向來sell實用易著嘅UNIQLO都出事,一件新出嘅外套狂被網民恥笑!

最近UNIQLO陸續推出春夏新裝,其中一件男裝外套款特別受到關注,因為呢件軍事外套(ミリタリージャケッ)正面設計有4個大袋,被日本網友取笑激似中山裝…「根本係毛澤東」、「比較似金正日吧」,亦有人話似「囚犯」、「人民公社」、「北越士兵」、「啱啱戰敗嘅日本兵」等等,仲有人搞笑上載埋幾頂士兵帽,話唔知應該襯邊頂好!

其實呢件衫畀鬼佬model著嚟影相,個人認為尚算OK,但亞洲人就真係比較難carry…近日天氣早晚溫差都大,想帶外套,建議以下呢幾款比較穩陣!

1.牛仔外套

牛仔係一年四季都興嘅元素,牛仔外套亦係男生最愛著嘅外套款式之一,簡單內搭恤衫下身襯返牛仔褲denim on denim1又得,或者襯上杏色chino pants,打造休閒文青感。

2.恤衫外套

薄身嘅恤衫既可以單著,又可以當外套增加層次感,春夏天點都要有件旁身。

3.軍事外套

充滿男人味嘅軍裝元素外套,向來深受男士喜愛,迷彩、軍綠、啡色都係大路顏色。

4.飛行外套

源自MA-1嘅Bomber Jacket飛行員外套,近幾季幾乎男男女女都總有一件在手,著上就係型。

圖片來源:UNIQLO,2CH

家有一老 阿嫲太好心幫手縫埋爛牛仔褲啲窿!

自認走在潮流尖端,衣櫃入面點會冇條爛牛坐陣?但老一輩似乎唔多識欣賞,最近就有位日本網民大呻自己條爛牛畀阿嫲縫埋啲窿,都唔知好嬲定好笑喇。

早前有位男網友po咗張牛仔褲相上討論區2ch,原本佢條牛仔褲有好多「刷爛」嘅裝飾,但阿嫲以為乖孫條褲著爛咗,趁佢唔喺度嗰陣幫佢縫起哂爛牛上面啲窿,日男發帖文表示失落,不過其他網友一面倒大讚嫲嫲手勢好,「嫲嫲真體貼,縫得超靚」、「咁樣反而仲好睇,遲啲可能會興呀」,勸日男要好好珍惜呢條褲,「多啲著條褲多謝嫲嫲啦」,日男見大家反應唔錯,心情變好,仲話「搵日真係著出街睇睇先」。

話時話,爛牛係潮,不過當牛仔褲嘅破洞越來越大,好影響觀感,著亦麻煩,不如利用以下幾個創意物料修補,令爛牛起死回生!

1.牛仔布

DIY用剩嘅牛仔布碎,或者從舊牛仔褲剪布出嚟用,覆蓋喺破洞上,縫好後變成流行嘅deconstructed jeans。

2.魚網

魚網絲襪襯爛牛係日本妹慣常著法,如果將「魚網」直接縫上爛牛,既可以防止破洞變大,又可以DIY一件潮物出來,一舉兩得。

3.繡章

繡章牛仔褲係街頭常見大熱item,不妨試下於破洞位置燙上幾個心水燙章,又潮又有玩味。

圖片來源:2ch

港女講日:日本女人公認的「靚仔5大特點」

每個女人心中都會有一個對於「帥哥」嘅定義,未必一定係好靚仔或者好有錢,咁喺日本女大學生眼中,咩男生先叫做「帥」呢?

日本網站《gakumado》最近以「成為帥哥的條件」做調查,以下係Top 5,同你哋心目中又同唔同呢?

第5位 髮型要好睇

對日本年輕女性嚟講,髮型好壞係決定佢係唔係靚仔嘅重要因素,髮型可以改變一個人嘅外表,唔想女生覺得你又薯又老土,快啲搵個好嘅髮型師轉轉look!

第4位 眼睛要有神

女生特別注意男仔嘅眼神,眼仔碌碌、炯炯有神咁望住女仔,對方一定畀你電暈!相反,眼神空洞、呆滯絕對係大忌,就算你五官標緻,對眼冇神一樣唔會得到女生歡心。

第3位 鼻樑要夠高

鼻高唔一定係靚仔靚女,但一個大鼻、扁鼻嘅人,都常都與「靚」未無緣,so sad…

第2位 著衫要時尚

鼻扁冇得救,不過穿搭可以!日本妹向來重視個人style,如果你能夠畀到佢哋有「你識著衫」、「有品味」嘅印象,同樣係一大加分位。

第1位 身高要夠高

現實係殘酷,以上幾點都可以靠後天調整惡補,身高就真係幫你唔到。高大嘅男生可以更易令女生產生想依靠嘅感覺,著咩衫整咩造型都會比較好睇。

圖片來源: 日網joseishi、besttimes

外國人投訴日本旅行5大缺點?

日本係唔少人出國旅遊嘅第一選擇,頻密程度多過返鄉下,就知日本有幾咁吸引啦!

唔只香港人鍾意「返鄉下」,美國人亦一樣,美國Reddit討論區有一個日本旅遊板(JapanTravel),經常講起日本有邊度好玩嘅話題。不過所有嘢都有優點同埋缺點嘅,日本都唔例外,最近就有個貼文問起日本負面嘅地方。

樓主gatekeeper_deity發文問:「日本有咩好我都聽夠喇,想問下大家有咩令人反感之處」,估唔到網友們反應超熱烈!以下精選幾個原因,大家又認唔認同呢?

1.房細床窄

普遍日本酒店房都好細,理所當然張床同埋廁所都一樣咁迷你啦,好彩我哋香港人身型同日本人差唔多,但對於大大份嘅美國人嚟講又真係幾困擾嘅…

2.蹲式馬桶

據日本觀光局指出,目前4000個熱門景點嘅公廁,仍有4成使用蹲廁,但普遍西方人嫌蹲廁唔衛生甚至唔識用,所以日本政府將會於2020年東京奧運舉行前,將呢樣唔受歡迎嘅物件換成外國人習慣使用嘅坐廁。

3.吸煙文化

香港食肆全面禁煙已經好多年,但日本至今依然係行「分煙」模式,好嘅餐廳會分開樓層或區域,劃分為吸煙區同禁煙區,但事實上四周快餐店、親子餐廳都會見到日本人食飯時吞雲吐霧,令討厭煙味嘅遊客好難受,難怪好多外國人對「餐廳內可盡情食煙」都唔多like。

4.垃圾桶少

日本係一個非常乾淨嘅國家,但好多外國人都好奇怪,點解街上得咁少垃圾桶,咁啲垃圾掉去邊呢?根據日本人嘅觀念,條街本來係冇垃圾,垃圾都係人類自己帶出來,所以自己嘅垃圾應該帶返屋企/酒店處理,仲要分類回收。呢種咁重視公共衛生嘅傳統,全世界都應該向日本人學習!

5.逗留時間

不過獲得最多網友認同嘅一個「缺點」就係,「最後都係要走…」,唔只美國人,亦係香港人嘅心聲呀!!!

圖片來源:APA hotel

全職媽媽心聲!老公丟低屋企去追動漫明星

人哋話生仔要考牌,其實做人老公老豆都一樣,因為呢個世界上太多自私男人!

最近「LoveLive離婚」呢個名詞喺日本討論區2ch「孕婦板」引發話題,話說有位懷孕女網友發文大呻老公自私,終日沉迷偶像動畫《LoveLive!Sunshine!!》:「我個肚都7個月咁大,佢都堅持走去聖地巡禮!預產期5月,仲猛咁話話要去6月嘅演唱會!,令我腦中浮現『LoveLive離婚』呢個詞彙。」

網友紛紛留言,鬧到呢個老公狗血淋頭!孕婦網友繼續爆老公有咩過分行徑,例如間房塞滿動漫公仔、帶老婆去動漫電影相關地方、屋企狂播主題曲等…全職工作嘅孕婦表示身心疲勞:「男生都冇身為父母嘅自覺嗎?得閒買雜誌不如一齊睇嬰兒用品,我已經好累了,拎演唱會枝螢光棒敲佢個頭,佢會唔會醒呢?」

一個家要靠兩公婆共同付出及經營,如果有一方總係顧著自己,肯定會引起另一半不滿!唔少媽媽大呻屋企有個自私老公,唔知以下5種自私行為,你屋企個佬中唔中呢?

1.休息時間

老公收工就係食飯、上網打機,完全唔同小朋友玩,佢每日工作9個鐘大哂咩,我做全職媽媽工作24個鐘仲全年無休!有天只係提早瞓,叫老公湊細路,佢第二朝起身就鬧我做咩唔理小朋友,媽媽都係人唔係工人呀!

2.唔分擔家務

一個「返工好累呀」就可以將襪亂丟、飲料空罐放檯,完全唔理家務,當屋企係酒店,自己係老爺!

3.斤斤計較

買車、遊戲點數就好大方,叫佢買份禮物氹我開心就拖拖拉拉。亦有全職媽媽指老公認為每月畀基本家用就得,其他生活雜費從來唔主動畀錢,分分鐘工人姐姐都高人工過佢!

4.唔理老婆外家

有老婆表示自己屋企人去旅行總會買手信畀佢老公,埋怨老公旅行只會買手信畀自己兄弟姊妹,每次都為咗假日返娘家定婆家而嘈交。

5.唔避孕

做個負責人嘅男人,性事唔應該只顧自己開心,要老婆食避孕藥,自己唔帶套又唔肯做結紮手術。「佢話怕痛,我生仔夠痛咗幾次啦,佢痛一次都唔肯!」

圖片來源:[email protected]