風光背後嘅陰暗面…日本10大「不值得驕傲的世界第一」

唔少香港人視去日本旅遊為「返鄉下」,對當地美食、風景、人民質素均有讚冇彈。不過身為遊客,往往會忽略風光背後陰暗嘅一面,早前日本網媒《The Mystery》就搜集咗日本10個「唔值得自誇嘅世界第一」,顛覆原本日本喺大家心目中嘅好形象!

1.農藥用量

你以為農藥用量最多嘅一定係偉大嘅祖國?錯喇,原來畀人新鮮又乾淨嘅日本農作物,農藥使用量冠絕全球,比美國仲要高5倍!如果真係講究健康,建議選購有機蔬菜而唔係一般農產品。

2.長期臥床老人數量

眾所周知,日本是全球最長壽嘅國家之一,但長壽唔等如健康,隨住醫療技術進步,日本有大量高齡人士百病纏身,需要長年接受治療,其實對於老人家嚟講,長期臥病在床不起,可能係一種痛苦。

3.精神病院數量

日本全國共有8,605間醫院,至去年9月為止,就有多達1,076間精神病院,佔病院總數12.6%,精神病床位則有34萬個,佔全球床位嘅5分1,病床數及住院天數亦高於世界平均值。喺日本生活要面對工作及住屋等極大精神壓力,難怪會有咁多精神病患者出現。

4.食物添加劑種類

即食食品喺日本大行其道,常用嘅食物添加劑種類亦遠超其他先進國家,美國有130種、德國有64種、英國有21種,日本卻有多達1,500種以上!不過文章強調食物添加劑種類多,但唔代表一定對健康有害。

5.撲殺流浪動物數量

2004年,日本全國人道毀滅嘅動物總數高達38萬隻,其中貓佔24萬,狗佔14萬左右,計起上來每日平均有過千隻動物被人道毀滅!幸好近年全國有唔少動物愛護團體興起,人道毀滅數量已明顯下降,至2015年大約有8萬隻流浪動物被殺。

6.年輕人自殺率

據統計,2017至18年日本共有250宗學童自殺個案,當中大部分係高中生,另外亦有6名小學生自殺。文章指出15至34歲年輕人自殺原因多為工作壓力及憂鬱症,反映日本職場文化同埋社會壓力異常,同精神病院數量係世界第一亦有啲關係。

7.廚餘數量

日本每年平均丟棄2,000萬噸剩餘食物,即每秒鐘就有8,600個飯糰被丟落垃圾桶,數字比人口多2倍以上嘅美國仲多。另外,日本食品大部分都係依賴進口,但當中近3分之1卻被當成廚餘處理掉,當世界上有1,500萬人捱緊餓,日本人咁浪費食物,真係好折墮!

8.自來水氯含量

好多人覺得日本嘅自來水好乾淨,打開水龍頭就飲得,雖然係真,但為咗除菌,自來水加入大量氯,使用量幾乎係其他國家嘅10 倍,亦係引起多種皮膚病嘅主因,大量吸收亦可能致癌。

9.唔做家務嘅老公人數

雖然而家講求男女平等,日本「男主外、女主內」嘅傳統觀念仍然根深柢固,歐洲地區約有30-40%男士婚後會幫手家務,但日本只得18%,位列全球最低位。

10.基因改造食品數量

前面提到大部分日本食品都係海外進口,而且大部分都有經過基因改造,雖然唔清楚呢啲食物食得多對身體有冇害,但好多日本人都心水清,知道唔係好事。

圖片來源:www.pakutaso.com

敏感部位你要知!日男投票「最想被摸的4個部位」

要維持一段關係,雙方嘅肌膚之親係好重要,情到濃時,情侶們首先當然係錫錫先,之後,就開始摸啦仲駛講!

日本女性戀愛網站Ananweb就呢個議題,訪問咗好多男生意見,當與對方kiss時「男生最想被女生摸嘅部位」係咩呢?主要有以下4個:

1.頸

頸係一個好敏感嘅部位,撫摸男人嘅頸部,隨時已經係一種性暗示!31歳受訪者ノボル表示有次同女生去酒吧,兩人都飲到醉醉哋,有feel就開始互錫,男生注意到女生撫摸自己頸部位置,除咗興奮,更令佢產生一種「大人接吻」嘅感覺,feel so good咁話。

2.手

握手呢個動作,原來可以激發男生嘅保護欲。32歳カオル分享自己同女友嘅一段經驗:某日倆口子回家途中經過一條小巷,佢主動抱起女友來錫,當下女友緊握住佢隻手,呢個時候男生就產生一種「想保護佢」嘅感覺。其實唔只錫錫時,平時如果女生鍾意拖住男生隻手,唔係貪你隻手夠滑,其實係想發出「想要被保護」嘅signal。

3.背

32ヒサシ指某次同女友鬧到好薑,對方嬲到想轉身走,男生為挽留女友除了即刻道歉外,仲極速從後攪實對方,再轉身親吻對方。女友大概被男友行動融化,同樣緊緊攬住男生背部,男生就表示女友呢個動作,會讓人有一種非常強烈「佢唔想離開你」嘅感覺,最後咪和好如初啦。

4.屁股

最後一個部位….係以為係前面敏感位置嗎,又唔係喎,係後面先啱。30歳コウジ某次同比「年上女」去酒吧飲酒,對方散發住一種成熟魅力,加上飲完兩杯成個身都興哂,兩人好快打得火熱,kiss時姐姐隻手就由上至下放到自己屁股位置,咁積極進取嘅舉動,令佢心跳加速到停唔到落嚟。識玩當然係同姐姐玩!

圖片來源:www.pakutaso.com

當貓貓係咕𠱸?日本媽媽縱容個女虐貓

好多父母好鍾意影低寶貝仔女得意有趣一面,再po上網呃like自得其樂。最近日本父母流行使用「#育児衝撃写真」或「#育児衝撃画像」呢幾個twitter標籤分享小朋友嘅「衝撃影像」,不過小心呃like唔成反而變「炎上」吸嬲!

近日一名位名叫瓶子可南子嘅設計師,分享呢張囡囡坐喺喵星人身上睇電視嘅相,從姿勢上嚟呢位妹妹仔似乎坐得相當舒服,好滿意呢塊坐墊貓肉坐墊」,喵星人眼神無奈中帶點厭世,不過未有任何動作,任得小妹妹坐。

見到貓咪與小朋友和平相處,應該畀like先啱,不過居然激嬲咗一班愛貓人士,佢哋質疑呢位媽媽見到個女坐喺隻貓身上,做嘅第一件事居然係影相而唔係制止,覺得貓咪好可憐!

「呢個唔係影相嘅時候,應該話畀佢知唔應該坐喺比自己細小嘅生物之上!」

「唔通你唔知內臟會裂或骨盆會扭曲嗎?佢連郁都郁唔到,擺明係虐待!」

「至憎啲淨係識縱唔識鬧嘅父母,咩隻貓好柔軟、唔舒服會自己跑開…唔通寵物處處忍讓,主人就可以為所欲為?」

大家又點睇呢?貓咪究竟係享受、冇所謂定唔情願呢?不過呢位媽媽之後再上載影片,證明囡囡仲係嬰兒時期已經同隻貓打成一片,貓咪會主動瞓喺BB身邊,由得佢捉住自己條尾,又畀BB踩自己個頭,可見兩人感情深厚。

圖片來源:[email protected]

鬆弛熊登陸Netflix!日本限定鬆弛熊餐點可愛到唔捨得食

Netflix間中都會將日本漫畫製作成動畫或真人版電影,繼《死亡筆記》、《龬之煉金術師》後最近又有新作,主角就係大人細路都like爆嘅鬆弛熊!

鬆弛熊日文名係Rilakkuma,由英文"Relax"及"Kuma"(日文解作熊)組合而成,由於日本人每日工作繁忙,但其實內心都好想生活得輕鬆自在,所以設計呢個角色嘅近藤亞希,希望藉住鬆弛熊來實現都市人嘅願望。

鬆弛熊一紅就紅足15年,第一部長篇動畫《輕鬆小熊與小薰》嚟緊將於4月19日在Netflix平台獨家播放,合共13集,每集10分鐘,內容講述一位打工仔小薰與鬆弛熊同居發生嘅日常趣事,小薰成日都好黑仔,不過鬆弛熊就好似暖男咁默默守護喺小薰身邊!其他角色好似豬鼻雞、小白熊都會亮相,啱晒平日忙爆嘅香港人,收工返屋企hea住睇,放鬆一下!

粉絲淨係睇卡通又點夠喉,不如食埋鬆弛熊和菓子同埋鹹甜點落肚!去開日本記住幫襯呀~

1.櫻花和菓子

繼Hello Kitty、多啦A夢、米奇老鼠等卡通角色後,BANDAI再次推出卡通造型和菓子!今次以鬆弛熊及豬鼻雞做主角,適逢櫻花季,熊同雞仔都戴住櫻花飾物化身超可愛「食べマス」日式和菓子,一盒兩款,鬆弛熊內餡係黑蜜味,小黃雞就係櫻花味,每盒售價為395日圓,於日本全國LAWSON便利店有售。

2.期間限定cafe

日本人氣服飾品牌gelato pique旗下gelato pique cafe近日聯乘鬆弛熊,即日至5月6日開設「gelato pique cafe meets with RiLAKKUMA」期間限定cafe,推出一連串鬆弛熊造型餐點包括漢堡、咖哩蛋包飯、High Tea套餐等,仲有可外帶嘅甜品禮盒,樣樣都得意到唔捨得食呀!

圖片來源:Netflix、Bandai、gelato pique

幾忙都要愛自己 新手媽媽的保養小細節

當媽媽有幾辛苦、有幾偉大,相信不用多說。最近有日本公司發明了「爸爸餵奶神器」,只要新手爸爸穿上呢件仿造女性乳房外型的背心,就可以輕輕鬆鬆餵奶。呢件背心,名為「爸爸育兒助手」(Father’s Nursing Assistant),其中一邊的人工乳房可以裝進母乳,表面可以發熱至接近人體溫度,質感柔軟如皮膚,令BB安心飲奶。除此之外,背心內部還裝設了感應器,可以記錄寶寶進食與睡眠時間,資料會自動傳送到電話APP中,令爸媽更好掌控孩子的作息同飲食份量。可惜,目前呢款餵奶神器重未真正發售。

作為新手媽媽,生BB後一個月絕對係忙到不可開交,有時連訓覺都無時間,更可況係扮靚時間?如果大家真係無時間保養的話,不如等生活小細節做起,湊仔同時都要愛惜自己。

別皺眉頭

即使遇到咩難事,都唔好皺眉呀,因為皺眉時,眉心肌肉收縮就會容易形成皺紋,長此下去會皺紋愈多,望落更顯老。

膠原蛋白防胸下垂

母乳媽媽可能會有胸部下垂或鬆弛的問題,坐月期間記得多吃富膠原蛋白的食物,加強肌膚彈力緊緻,防止鬆弛,如豬腳、豬皮、海參等。

做體操或拉筋

坐完月,不妨同BB外出散步,平時在家做點體操或拉筋,增加運動量,希望可以改善身型。

熱敷「媽媽手」

新手媽媽因錯用手腕力抱B,令拇指附近疼痛不堪,閒時要佩戴護腕,定時熱敷患處有助減少痛楚。

相片來源:urdesign @youtube

揀錯枕頭會有雙下巴 日本專家教你5秒瘦面操

明明我咁瘦,點解會有雙下巴?你有冇誋過,原來同揀錯枕頭有莫大關係!

早前日本節目《林先生が驚く初耳学》請來首都大學東京竹井仁教授講解雙下巴成因,教授表示有雙下巴唔一定係肥,關鍵在於下巴至頸部嘅筋膜能否保持原有彈性,仲解釋揀啱枕頭嘅重要性

教唔建議大家揀太軟同埋太高嘅枕頭,首先軟枕頭會令頭部沉入枕頭之中,令下巴至頸部筋膜喺瞓覺時長期伸展,筋膜就好似橡筋咁,長時間拉長,好快鬆弛!枕頭太高的話,會令下巴向下傾,瞓覺時令氣管受到壓迫,有礙血液及淋巴循環,容易引起浮腫、鬆弛問題,長期使用一樣有機會形成雙下巴。

教授亦教大家用4條毛巾調較最理想嘅枕頭厚度:將1條毛巾對摺2次成為4層,再用3條毛巾,每條對摺1次後分為3份對疊,高度就會啱啱好承托到頭部,唔會造成雙下巴。

坊間有傳抬高頭可以消除雙下巴,不過教授話係錯架!原理同拉橡筋一樣,筋膜彈性變弱,只會令雙下巴情況越來越嚴重。

之後教授即席分享簡易瘦面操,教大家輕鬆擊退雙下巴。首先雙手放於頭部後方近頸部位置,慢慢將頭部壓低,將下巴拉向鎖骨位置,維持5秒。每日3次,連續做2星期立即見效!

圖片來源:www.pakutaso.com

玩腋毛!特寫J奶!日本女youtuber另類風格出位!

當細路寫「我的志願」都係話要做Youtuber、網紅、KOL,就知呢個職業幾咁受年輕人歡迎。做Youtuber門檻好低,只要有部手機就可以拍片,不過想突圍而出又唔係易事,不如同以下幾位日本有特色或有主題嘅女youtuber偷吓師!

1.玩胳肋底毛

好重口味!呢位以腋毛做主題嘅youtuber叫做「長ねぎ@negion_ch」,其中一個「腋毛Challenge」特輯,大致係拍佢自己如果唔剃腋毛,過幾耐會長幾多嘅實驗,其中呢條「腋毛放養成計劃-第二個禮拜」嘅片,4個月有超過183萬人次睇過!!!再重口味都有,就係玩「腋毛接睫毛」,首先將喺100円店買嘅假睫毛修短少,然後連根拔起自己留長嘅腋毛,再痴膠水痴實喺睫毛上面,最後痴上眼…完成品都幾嘔心!

2.胸部特寫

呢位youtuber「日南(かなん)」原意唔係想低俗sell大胸,佢個頻道主題其實係ASMR ((Autonomous Sensory Meridian Response 自發性知覺高潮反應),指透過視覺、聽覺、嗅覺或觸覺,刺激身體某啲部位產生愉悅反應,影片內容多數係女人拎住唔同嘅物件發出聲響。日南亦一樣,主要係對住鏡頭表演ASMR,因為用來發聲嘅小道具都喺胸前,所以close up胸部亦好理所當然。之不過日南日南前偉大,一時係OL打扮,一時著高領貼身冷衫,難怪令男生有瑕想,聽得(睇得!?)好興奮…

3.日常料理

覺得以上兩位youtuber太有個性,自問學唔到?咁都可以學吓「岡奈なな子」,有咩特色?簡單來講就係一個著得好樸素嘅靚女,然後喺一個好簡潔嘅場景,教大家煮餸,最後喺鏡頭面前食埋,分享過嘅美食有日式漢堡、麻婆豆腐、炸豬扒飯、溫泉蛋烏冬等,只要你自問又靚又識煮幾味,都有潛質做個當紅youtuber!

圖片來源:twitter.com/negion_ch

主動女人最好命? 18歲日本妹示範6招溝仔必殺技

image

日本網路電視台AbemaTV節目《僕たち…つきあってます!》,係一個專門播出解決情侶煩惱嘅戀愛節目,雖然唔係電視台放送節目,但因為情侶們個案太「特殊」而經常引起熱話。

最近一集主角係日本一名18歲少女Ayaka(アヤカ)同埋21歲男友シン(Shin),Ayaka自爆性經驗對象超過500人,男方就因為女友太過肉食而好苦惱!

講返呢對情侶嘅相戀故事先,原來佢哋由相識到拍拖只係用咗6個鐘:Ayaka於演唱會遇上Shin並主動搭訕,睇完演唱會後食飯再順便去酒店,當晚就一齊咗喇…不過兩人交往9個月內,Ayaka不斷出軌,試過1腳踏12船,甚至一日內分別與4個男人發生關係…究竟係咩原因驅使男友繼續同Ayaka一齊呢?應該同Ayaka以下幾個溝仔絕技有關!

第1招:視線攻擊

只要鎖定一個目標,就會不斷令對方感受到佢嘅熱情同埋好感。

第2招:狂讚男生

問男生一啲個人問題,一搵到機會就要狂讚對方,令男生精神層面獲得滿足,就好似前戲一樣咁重要!

第3招:肢體接觸

偷偷喺檯底拖住男生隻手,或者摸佢大脾,營造只屬於兩人嘅秘密共有感。

第4招:緊貼男生

超近距離貼住對方,就好似隨時可以鍚到,令男生心癢癢。

第5招:食男生口水尾

分享同一件食物,好似間接kiss嘅刺激感,瞬間縮短兩人距離。

終極絕招:一齊去洗手間

趁男生去洗手間一齊跟住去,再喺隱密地方同男生熱情擁抱,表示自己情不自禁好想要…

Ayaka話成功駛出呢6招,99%男生一定會中招!不過網民就唔多認同,有人表示「呢條女畀人感覺好易食,先會有咁多男人埋身」、「真正靚女唔駛靠呢啲,一樣受男生歡迎」,而大部分人都認為「男生只會當呢種女生係玩嘅對象,唔會同佢認真交往。」

圖片來源:節目截圖

朱古力都食得?推介5種「不致肥」深夜小食

係人都知食宵夜係極易致肥,但近日有項研究指出,臨瞓前進食同變肥並冇直接關係!

日本岡山大學醫療科學部日前發表一項為期3年嘅研究,以1,500多位年齡40-74歲嘅中、老年人做研究對象,主要量度佢哋嘅「糖血化色素」(HbA1c),數據可反映體內血糖控制情況。調查發現,就算臨瞓前兩小時進食,唔會對血糖高低有太大影響,所以「食宵夜」並非體重增加嘅主因。

岡山大學指出,身高體重指數BMI、吸煙或飲酒量等,反面對血糖水平有更大影響,不過大學亦補充,研究結果或因各國飲食文化唔同而有偏差,始終日本人飲食文化以蔬菜為主,同西方國家多肉少菜實有好大分別!

雖然話食宵夜唔係致肥主因,不過做人都係有啲節制好,肚餓時揀啲相對冇咁肥嘅小食啦,推介以下5種小食畀大家,你以為好肥?其實又唔係喎,真係估佢唔到!

1.黑朱古力

有科學家比較過黑朱古力同埋牛奶朱古力,發現黑朱古力可以令人更飽肚,更有效抑制想食甜食嘅慾望,減低卡路里攝取。口痕時不妨食2至3塊75%-80%濃度嘅黑朱古力。

2.爆谷

爆谷都減到肥?唔係指睇戲食嘅爆谷呀,講緊係冇經過調味嘅。低卡又輕易帶來持續飽腹感!如果你嫌佢太淡,可以酌量加鹽或香料,但千析咪加牛油或焦糖!

3.香蕉

低脂肪之外,仲含有大量「複合式碳水化合物」,因為需要更多時間去消化及吸收,所以會令飽肚感持續。

4.雞胸肉

宵夜食肉會唔會太heavy?其實雞胸肉低卡路里又高蛋白質,絕對係宵夜飽肚之選!但記得食之前要去皮、去皮、去皮!!!

5.芝士條

研究顯示,芝士卡路里並唔高,而且蛋白質與脂肪含量能夠令人急促飽肚,係宵夜良伴。此外,芝士有色氨酸,可以有助入眠,令你一覺瞓天光,第二朝精精神神返工!

圖片來源:日劇「只要有北齋和飯」截圖

拉麵配搭點揀好?一蘭員工教perfect配搭

相信大家都食過「一蘭拉麵」,不過點樣嘅配搭組合先係最好食,大家又有冇深究過呢?

日本朝日電視台早前舉辦國民連鎖拉麵店選舉,最後一蘭壓倒性勝出,於是《日刊SPA!》就搵嚟有年資近10年嘅一蘭員工,調查一下食客嘅拉麵配搭選擇,綜合3大食法,究竟點食先最perfect?

基本版:適合第一次食、唔食辣嘅食客!

其中一款最多人點嘅配搭,就係咩都唔駛煩,揀哂「普通」就啱喇。一蘭員工表示呢個叫法可以食到一蘭嘅味道,第一次食又或者食唔辣嘅朋友都可以咁樣揀。

追加半熟蛋:食拉麵之前食!

半熟蛋係拉麵嘅靈魂,有啲拉麵店會將半熟蛋放喺拉麵上面一齊上,有啲店舖會分開上。一蘭認為佢哋嘅自家半熟鹽味蛋可以清除口中殘留嘅其他味道,主限食拉麵前先食半熟蛋,咁就可以淨化味覺,食麵時先可以認真細味麵條嘅味道。

終極食法:加辣係重點!

最體現到一蘭拉麵精粹嘅配搭,就係「口味濃淡-濃、油濃郁度-超濃、蒜泥-1份、蔥-混合、叉燒-有、秘製辣醬汁-3倍;麵條硬度-超硬」。資深員工更爆料,指秘製辣醬汁最多揀3倍好喇,呢個先係辣椒同埋醬汁最完美比例!員工仲好老實咁話:「一蘭叉燒唔係特別好食,性價比低,唔建議追加。」至於揀蔥時,原來可以一次圈哂兩款,唔知香港又得唔得呢?

官方亦有分享一蘭拉麵最正宗食法,就係先食幾啖麵同埋飲幾啖原味豬骨湯,再慢慢將「赤紅秘製醬汁」拌入拉麵。最佳加麵時機係食到一半時追加,咁食完碗麵之後就啱啱好送到。另外,有餓底表現追加白飯先係最好食,呢個係日本人傳統食法,一羹飯一羹湯一齊食,無敵呀!

圖片來源:一蘭拉麵facebook page