矮妹特別受歡迎?日男總結6個爆笑理由

日本男人眼中,矮妹向來比高妹受歡迎,因為大男人心態覺得呢類女生會比較小鳥依人。最近日本一位網友NaRu就總結矮妹受歡迎嘅「另類」理由,令人O哂咀:

1.容易用膝頭哥擊倒

男仔非常在意自己女友能否用膝頭哥擊倒。嗌交時傾唔掂數,可以用武力,即膝頭哥解決,咁對住矮妹男人當然有優勢啦,自己會有一種征服感!留意君子動口不動手,打女人係唔啱的,唔好學呀!

2.易啲收埋

女友存在嘅大部分時間都好美好,但某啲時候可能唔方便出現,生得矮嘅女仔可以隨意收埋,避免麻煩發生。我想問,究竟有咩時間女友係唔方便出現架呢…唔通你係明星玩地下情?定你唔只一個女友呀?

3.可以做拐杖

人同人之間需要互相支撐,作為支撐嘅一方比較短都好正常,所以生得矮嘅女仔係人類世界,不可或缺嘅重要存在!將矮妹比喻為拐杖,撐住男友,呢個原因有創意我鍾意。

4.想送畀佢好大束嘅花

唔知點解男仔似乎都有呢種諗法,紮花大束啲,一定惹來街上好多羨慕又妒忌嘅眼神,男人自己都威啦。可以體現手上拎住好大束花嘅,一係你好有錢真係買束巨型鮮花,唔係嘅話,生得矮嘅女仔就大派用場啦,個人細粒自然顯得束花大紮啲。雖然有啲自欺欺人…

5.表露自己高大威猛

男人其中一個最大成,就係喺心儀對象面前表現「高大威猛」一面,一時來個公主抱,一時騎膊馬,令人感覺好強大…當然呢啲係矮妹專利啦。

6.令人產生保護欲

被生得矮嘅女仔跟住會好開心,然後轉化成一種保護欲,之後會好想攬實佢。

圖片來源:www.pakutaso.com

Leave a Reply

Your email address will not be published. Required fields are marked *