生活上的小賤人 人見人憎5大無品行為逐個捉

女人有兩個秘密,一個係年齡,另一個就係體重,打死都唔會講。最近有個日本綜藝節目就呃女藝人踏上機關,然後公然將佢個磅數話哂畀全世界知,畀著你又會唔會超嬲?

日本啲整蠱節目向來夠癲,早前聖誕特備電視節目「人気芸能人にイタズラ!仰天ハプニング150連発」就喺4個半鐘瘋狂惡整藝人,不過其中有個遊戲就被網友鬧到體無完膚…

呢個整人遊戲喺一個臨時講台地板暗藏體重計,跟住呃女藝人參加「美與健康講座」上台分享保養經驗,講到一半,藝人背後會突然顯示體重!演員磯野貴理子報「細數」,自稱42公斤點知實際係46.9;49.5公斤重嘅朝日奈央就好驚訝:「唔係啩,咁誇張,被人知道哂喇!」

台下扮觀眾嘅老臨笑到肚都痛,但係真電視觀眾就一面倒劣評,認為呢個遊戲低智、令人睇完唔舒服,甚至激動話已經構成性騷擾,狂鬧節目製作人冇品!唔事先問人想唔想公布就逼人就範,又真係好唔尊重,不過睇埋以下日常生活常遇到嘅冇品行為,可能你又會覺得被人公開體重冇咩大不了…

1.火車頭

無品行為之首,非邊行邊煲煙嘅火車頭莫屬!吸煙者想生cancer、陽萎、不育就自己事,但非吸煙者係無辜,何必逼人吸萬惡二手煙??

2.擔遮入簷篷

天氣不似預期,落雨冇帶遮唯有走入簷篷避一避,無奈有種人明明擔住遮都要迫入簷篷底,將冇帶遮人士迫出簷篷,超無品。

3.入閘先摷銀包

入閘前或者上車前,拎定銀包或八達通,好難嗎?後面明明有好多人排隊等入閘或上車,有堆人總愛在閘前左摷右摷,浪費幾分鐘搵八達通阻住後面嘅人!點解唔可以企喺隔離搵,等人哋入閘先?趕投胎呀?

4.手袋當八達通嘟

有啲人特別係麻煩女人,好鐘意隔住手袋嘟八達通,嘟十萬次唔成功都要繼續嘟,好有毅力,令人佩服!

5.上電梯打尖

香港人平日識鬧打尖唔排隊嘅大陸人,但繁忙時段嘅港鐵站,香港人係唔識喺人龍後面排隊上電梯,而係由電梯口兩側攝入去,呢種打尖行為都好冇品。

圖片來源:節目截圖

Leave a Reply

Your email address will not be published. Required fields are marked *