港女講日:6大景點受難…「2018惡質訪日觀光客」上榜最多係咩國家?

_出國際系列!日本朝日電視台綜藝節目「ビートたけしのTVタックル」最近進行年度回顧,其中一集列出2018年外國遊客為當地帶來嘅麻煩,整理出6個「受罪」觀光景點,至於邊個地方嘅遊客引發最多問題,唔駛講都估到吧…


1.京都府嵐山竹林

首先上榜係京都府嵐山,遊客點都要漫步竹林小徑,體驗自然風情,先叫做嚟過京都,問題係有好多人手多多,竹子上隨處可見唔同語言嘅刻字,韓文「相親相愛」、簡體中文「李偉立到此一遊」等等,總計有逾百條竹子受害,節目形容呢個行為係「將日本人個『心』割開」。


2.青森縣國家公園

第二個案例都係刻字問題,青森縣「十和田八幡平國家公園」今年出現無良遊客喺著名奇觀「樹冰」上,用紅色螢光噴漆塗鴉,原來係「生日快樂」嘅簡體中文版呀!


3.神奈川縣鎌倉聖地巡禮

神奈川縣嘅湘南地區係日本熱門嘅嬉水勝地,乘搭海岸邊行駛嘅江之島電鐵(江ノ島電鉄)別有一番風情,呢度仲有知名動漫《灌籃高手》中出現嘅江之島《鐮倉高校前駅》,因「打卡點」位於交通燈位置,來自中國、台灣等大量遊客姐經常堵塞馬路,險象環生。


4.富士山

近年愈來愈多遊客想征服呢座日本「聖山」,雖然富士山相較於日本其他山來講算好爬,但「相對好爬」唔代表易爬可以隨便爬,節目發現有好多玩命遊客,先有香港遊客在登山前飲酒,之後有著住恤衫皮鞋嘅中國人出現爬山…其他國家旅客亦各有令日本居民討厭之處,節目提及有俄羅斯遊客帶狗行山、有新加坡人為慳住宿費喺6度戶外露宿等。


5.山梨縣富士山腳忍野八海

唔爬富士山,到富士山腳欣賞「忍野八海」亦係熱門旅遊行程,但係強國人就成日糟質呢8個湧泉池,用泉水洗衫、不停丟硬幣入池許願,甚至仲擅闖民居、小朋友隨地痾尿等等,當地居民忍無可忍,唯有設置路障阻止觀光客。


6.石川縣金澤海產市場

金澤市除咗能夠體驗古老日本文化、溫泉,豐富海產亦係一大特色,觀光客必到有金澤「廚房」之稱嘅近江町市場。今次節目茅頭直指香港人,不斷對海鮮瘋狂影相,阻住店舖做生意外,仲拎起高價海鮮「打卡」,令海鮮變質,店舖損失難以估計。

圖片來源:ビートたけしのTVタックル

Leave a Reply

Your email address will not be published. Required fields are marked *