港女講日:整容變蛇精女 醫生都怕 呢5種心態整容必後悔

為咗整容可以去到幾盡?被稱為日本最強整容女王,自稱「法國娃娃」嘅Vanilla(ヴァニラ),5年前因整容前後對比太大,在日本綜藝節目「女人要看的事(私の何がイケないの?)」中爆紅成名,佢解釋因細個太醜樣而被同學欺凌,老豆唔安慰都算,仲話「鬼叫你生得樣衰,惟有忍吓啦」,於是決心踏上整容之路。

當時佢自爆已整形30幾次,總費用達1000多萬円(約70萬港元),眼、額頭、下巴、胸部、腰、臀部等都開過刀。日前佢上綜藝節目「悪魔の美容術~禁断の美容法を試した人は今大丈夫なのか!?」時,聲稱已用2億円(約1400萬港元)做手術,手術次數多到數唔哂!近日佢更轉型做Youtuber,分享自身整容經驗,不過大部分網民覺得佢愈整愈恐怖:「外星人呀」、「下巴尖到可以殺死人」,仲話淨係見到Youtube片縮圖已經好驚,唔敢開嚟睇!

好明顯Vanilla因兒時被欺凌而影響心理,導致整容成癮,分分鐘危及性命。現今社會,整容唔係咩新奇或唔見得光嘅事,但如果你有以下5種心態,千析咪整,日後一定會後悔!

1.以明星樣做標準

整容係運用手術、藥物、醫療器械等對人嘅容貌、部位形態等進行修復再塑,係可以增強外在美感,但唔係萬能,有啲人非整成明星樣不可,係不切實際嘅奢想!

2.一時衝動

因一時挫折、情緒影響而突然決定整容,根本就冇足夠心理準備,好多人手術後經常會出現後悔、不安或其他消極情緒。

3.寄望太高

好多人認為生活唔如意、失戀、婚姻失敗等與自身形象有關,從而希望通過整容擺脫困境。要知道整容可以令一個人變得更完美,但唔可以決定一個人嘅事業、家庭。因此,將解決生活困難寄託於整容嘅人,咪整!

4.要求唔明確

有啲人一味話想整得靚,但對「靚」嘅要求唔清晰,事後覺得唔滿意就認為係手術失敗,係醫生問題,好易產生糾紛。

5.吹毛求疵

完美主義者亦唔適合整容,因為你好易會將小傷口、缺陷睇得過重,整容話明係手術,又點會冇傷口冇疤?

圖片來源:[email protected]

Leave a Reply

Your email address will not be published. Required fields are marked *