【聖誕節禮物】2018十大最受日本男女歡迎的禮物清單

日本宮城縣呢個星期有單盜竊案特別受網友注目,警察從一名34歲男子屋企搜出贓物,竟然全部都係《麵包超人》相關玩具,其中又以積木最多,究竟點解好偷唔偷,專揀《麵包超人》嚟偷?

呢單《麵包超人》玩具大盜立即成為討論區熱門話題,好多網友第一時間估呢個小偷係咪有戀童癖,定純粹係《麵包超人》忠粉,點知兩樣都錯,原因只係想聖誕搵快錢!臨近送禮季節,賊人表示呢個時期偷玩具轉賣畀家長特別易,如果幾十件玩具都賣得出,都可以大賺一筆咁話!

家長諗送咩畀小朋友就話易,但對熱戀中情侶嚟講就係一大難題,好彩日本格價網站《価格.com》已經幫大家按預算同埋對象類型,列出十大受歡迎嘅禮物清單,根據今年個聖誕禮物特集,令男友同埋老公最開心嘅禮物,第1位係銀包,多間格實用款最perfect;其次係頸巾,網站提醒女生要按對方身高體型來選擇頸巾長度,質地要柔軟順滑,質量好嘅一條夠用成世!第3就係冷衫,傳統英式花紋最得體!第4至第10位順序係手套、鋼錶、公事用皮袋、羊毛大衣、鬚刨、朱古力同埋紳士皮鞋。

咁女朋友同老婆又鍾意收到咩禮物呢?最想收到係頸鏈,網站冇話一定要鑽石嘅,但最好要設計簡約、素材高質,男士們識做啦。第2位係手袋,質料以皮革最受女人歡迎,款式偏好crossbody,clutch呢類細袋;第3係戒指,網站話收到戒指會令女生有浪漫同幸福感覺,都冇話要鑽石嘅,男士自己衡量喇。第4至第10位順序係花、銀包、耳環、腕錶、皮帶、手套同埋美容儀器。

圖片來源:https://youtu.be/Pbla4V8za3k

Leave a Reply

Your email address will not be published. Required fields are marked *