旅行時4句説話 足證對方對你有興趣

好多人話愛情最美好嘅時候就係曖昧嘅階段,雖然雙方都估估下,不過往往呢啲時候經歷過嘅嘢先難忘同深刻。當然並唔係每一對男女都可以成功由曖昧走到一齊,如果曖昧嘅階段把握唔好,隨時有機會錯過咗一段大好姻緣。如果你同對方友達以上,又咁啱有機會成班人一齊去旅行嘅話,不妨留意吓你哋嘅相處中對方會唔會同你講以下呢幾句說話,如果有嘅話,恭喜你,你哋好有可能更進一步。

1.你好獨立喎

旅行過程中如果男士見到你可以好好照顧自己,獨當一面搵路搵交通工具都冇問題,佢可能會忍唔住稱讚你獨立,事實上如果一個男士讚你獨立嘅話,其實係件好事,因為證明佢哋覺得你有能力好好照顧自己,就算一齊都唔會為佢造成負擔。

2.你唔化妝好睇啲

一齊去旅行如果遇上要玩一啲水上活動,因或者係夜晚一班朋友喺酒店傾計, 對方可能都會見到你嘅素顏,如果你發現對方同你講覺得你唔化妝好睇啲,就證明佢對你絕對係有特別留神 ,而且仲識得欣賞你自然嘅一面。

3.你同其他女仔好唔同

去旅行嘅時候日見夜見,雙方嘅了解自然會更深入,如果你發覺對方搵機會講類似意思嘅說話,就證明對方暗地裏已經開始對你留心,而你性格嘅某啲特點亦都成功吸引到佢嘅注意,對方開始對你產生非常唔錯嘅好感。

4.不如夜晚一齊去⋯⋯

如果係成班朋友去旅行,好多時夜晚返到酒店都未必會有後續活動,而當對方主動邀請你單獨夜晚一齊出去見吓面飲下嘢,就證明對方已經決定向你進攻,佢對你產生嘅興趣亦都開始浮面,呢個時候,就到你俾啲反應啦。

相片來源:[email protected]

Leave a Reply

Your email address will not be published. Required fields are marked *