12星座旅行時的愛情進取度

獅子座好被動 天秤座捉緊機會

好多人都話愛情係一個時間同緣份嘅遊戲,你永遠唔會知道幾時先可以遇到啱嘅人,更多嘅時候就算遇到適合嘅人,但係遇著一個錯誤嘅時機,都可能只可以慨嘆一句天意弄人。係愛情面前,唔同嘅人都有唔同嘅選擇同行動,12星座係面對愛情嘅出現,都會採取截然不同嘅反應,以去旅行遇到艷遇為例,唔同嘅星座係唔同嘅選擇下,都會出現唔同嘅後果。

1. 金牛座

金牛座雖然係長情又有毅力,不過確定關係之前佢哋往往都好被動,希望可以用更多嘅時間去同對方相處認清對方,所以旅行時就算遇到有好感嘅對象,都唔會出現進展神速嘅情況。

2. 雙子座

雙子座嘅人生態度就係船到橋頭自然直,所以佢哋對於事情嘅接受程度好大亦都充滿好奇心,旅行時遇上一啲新認識又有趣嘅人時,會採取順其自然嘅方式,唔會主動推動關係亦都唔會抗拒繼續發展。

3. 巨蟹座

巨蟹座係12星座入邊最重視家庭嘅一個星座,所以當佢哋旅行認識到一個新朋友,佢哋會好自然理性地分析對方嘅條件,尤其係將來有冇機會可以同自己建立家庭,對方亦都要比到安全感佢哋,巨蟹座先會選擇同佢地繼續發展。

4. 獅子座

獅子座對自己充滿自信而控制慾強,旅行時就算遇到新認識嘅對象又覺得對方唔錯,佢哋都係絕對唔會採取主動,所以如果想同獅子座有進一步發展,就必須要比佢哋更加主動,令獅子們覺得你重視佢,咁你就會獲得晉級嘅機會。

5. 處女座

處女座面對愛情有自己一套嘅原則,旅行時遇上一啲新認識又覺得唔錯嘅對象都唔會貿貿然同對方發展,但係如果了解下發現對方符合佢多方面嘅要求,就會好樂意同對方更進一步。

6. 天秤座

天秤座嘅人比較大愛,而且旅行時遇到有機會發展對象嘅機率亦都十分之高,佢哋通常都會比較主動配合,希望可以係短時間內增進雙方認識,仲捉緊發展嘅機會。

7. 天蠍座

天蠍座與人交往嘅時候需要比較長嘅時間先可以打開心扉,所以旅行時遇上有好感嘅對象,佢哋會用盡方法查探對方嘅資訊,再決定會唔會同佢地更進一步,另外天蠍座對於床上嘅互動比較重視,性方面係咪可以配合亦係佢哋嘅考慮。

8. 人馬座

人馬座擁有旺盛嘅好奇心同埋極高嘅行動力,最鍾意挑戰同嘗試新事物,所以旅行嘅時候有艷遇繼而發展絕對唔係啲咩新奇嘅事,雖然佢哋比較容易發生戀情但係要維繫相對就比較難,所以通常異地發生嘅戀情都會來也匆匆,去也匆匆。

9. 山羊座

山羊座喺面對愛情方面都會比較理性 ,就算旅行時遇到有好感嘅對象都唔會採取進擊嘅方法,甚至會俾人一種冷漠嘅感覺,但係佢哋往往無法抵擋其他人對佢哋嘅熱烈攻勢,所以如果佢哋遇到比佢哋更主動嘅對象,會繼續發展嘅可能性就好高。

10. 水瓶座

水瓶座對於愛情比較遲緩,有時就算對方對自己有好感都未必感應得到,所以係異地遇到有好感嘅對象時,好多時只會當係識多咗一個朋友但係無向愛情方面發展嘅心理準備,相對來講會比較容易扼殺咗係愛情岀現嘅可能性。

11. 雙魚座

雙魚座對於愛情充滿浪漫嘅期待同憧憬,一旦愛情係生命入面出現就會全程投入,所以去旅行嘅時候如果遇到有好感嘅對象會不惜一切同對方發展,但同時如果對方並無此意,回歸現實後,會對雙魚座造成一定嘅打擊。

12. 白羊座

白羊座嘅個性比較急進,面對愛情嘅時候亦都會毫不猶豫,所以一旦係旅行嘅時候遇上佢哋覺得適合發展對象,絕對會選擇主動出擊,而失敗對佢哋來講亦都唔會造成好大嘅打擊。

pic: [email protected]

Leave a Reply

Your email address will not be published. Required fields are marked *