新造型太重搞到腰酸痛 楊千嬅公開老公減壓秘方

楊千嬅於平安夜在紅館舉行第二場演出,還親自傳授老公丁子高減壓秘方,將靈魂由腳趾連接上腦袋,令全場爆笑!

楊千嬅講嘢咁搞笑,難怪完騷後玩直播,被叫下次做棟篤笑。

普天同慶日子,觀眾亦特別熱情,快歌慢歌都全場大合唱。千嬅不時與觀眾互動,開騷後千嬅問大家平安夜想點玩?全場大叫「唱到12點」!千嬅說:「係喎,冇諗住平安夜倒數添,冇向紅館申請呀,你哋買31號張飛嘛,咁就一齊倒數!」

東星圖片

唱《可惜我是水瓶座》時,千嬅換了新造型出場,黑色單袖全身長裙,弗爆身材加上狀能大勇,觀眾如痴如醉大合唱。其後她說:「我希望大家都做到自己嘅理想、願望達成、搵到喜歡嘅人同佢表白…今日有無人係識咗新朋友買飛帶佢嚟睇,想發展吓㗎?好多男女睇我演唱會搞掂咗,我助手都係睇我演唱會識咗佢老公,結婚生仔,好旺㗎!」台下有人大叫「有」,千嬅興奮問他是否演唱會期間成功表白?觀眾答「係」,千嬅笑說:「我唱咗2個鐘咋喎,就變咗男女朋友?我啲歌真係好勁!」

東星圖片

另一個新造型就是在唱《野孩子》時亮相,白色裙襬就如巨型聖誕掛飾,甚有節日氣氛,誇張又搶眼,但裙襬又長又重令千嬅卻舉步為艱,她搞笑求救,「我條腰好冤(酸痛),有冇人上台幫我按摩?」

講到有壓力要放鬆,千嬅就表示老公丁子高是高手,「我以前好介意人哋講我乜乜物物,依家唔介意,因為咁即係有人關心和留意我,就算嗰啲說話令我好嬲、好忟憎,都值得珍惜!以前我好執著,後來被我先生(丁子高)薰陶,但我慧根領悟唔到!例如今次搞演唱會前期好緊張,某日有啲嘢唔順利搞到我好忟,丁生叫我坐低,冷靜吓!」

千嬅還模仿老公慢慢說:「合埋對眼、深呼吸,諗住你個腳板底(全場爆笑)由腳趾感受當下,連接身體,由腳趾到腳板底,上小腿到大腿……佢由腳趾講到個腦,足足講咗15分鐘,其實我當時仲係好嬲好忟,但冇再講,因為我知我再講只會更嚴重。雖然我冇成功連接到我身體,但丁生成功咁連埋我把口!你哋都可以試吓,原來呢種『冤』都可以增進感情!」令全場爆笑。

千嬅與老公丁子高(網上圖片)

Leave a Reply

Your email address will not be published. Required fields are marked *